Rossiya 13 mln dollardan ortiq mablag‘ni o‘g‘irlagan moliyaviy piramida asoschisini O‘zbekistonga topshirdi

Rossiya O‘zbekistonga 32 yoshli Suhrob Fozilovni ekstradatsiya qildi, u 2010 yildan beri respublika huquqni muhofaza qilish organlari tomonidan qidirilayotgandi. Bu haqda Moskva shahar prokuraturasi xabar berdi.

Erkak O‘zbekiston Respublikasi Jinoyat kodeksining 242- (jinoiy uyushma tashkil etish), 168- (firibgarlik), 243-moddalarida (jinoiy faoliyatdan olingan daromadlarni legallashtirish) nazarda tutilgan jinoyatlarni sodir etganlikda ayblanmoqda.

«Fozilov O‘zbekiston hududida 2007 yildan 2009 yil iyun oyiga qadar jinoiy guruh tashkil qilgan. U offshor hududlarda ro‘yxatdan o‘tgan xorijiy kompaniyalar vakillari yordamida tashkil etilgan bo‘lib, moliyaviy piramida shaklidagi totalitar hamda destruktiv xarakterga ega bo‘lgan va bu jinoiy guruh tuzilmaviy bo‘linmasiga rahbarlik qilib, uning faoliyat yuritishini ta'minlagan», - deyiladi xabarda.

Xususan, jinoiy guruh a'zosi va jinoiy uyushma bo‘linmalaridan birining rahbari sifatida u, aldash va ishonchni suiiste'mol qilish yo‘li bilan 2008 yildan 2009 yilning iyun oyigacha bo‘lgan davrda Samarqand viloyati hududida yashovchi 140dan ortiq fuqaroning mol-mulkini o‘g‘irlab ketgan. Ularning umumiy qiymati 61 ming dollardan ortiq bo‘lib, bu xorijiy kompaniya hisobiga o‘tkazilgan.

Shu bilan birga, Fozilov jinoiy guruhning boshqa bo‘linmalari rahbarlari bilan jinoiy faoliyatdan olingan daromadlarni legallashtirgan: 2008-2009 yillarda 13 million dollardan ortiq mablag‘ni. U o‘ta yirik miqdorda valyuta qimmatliklarini xarid qilgan va sotgan, shuningdek, Rossiya Federatsiyasining vakolatli banklari hisoblariga o‘tkazilishi lozim bo‘lgan valyuta mablag‘larini atayin yashirgan.

2017 yilning noyabr oyida davlatlararo qidiruvchi bo‘lgan Fozilov Moskva metrosida huquq-tartibot xodimlari tomonidan qo‘lga olingan.

Moskva prokuraturasi organlari tomonidan o‘tkazilgan ekstraditsion tekshiruv natijalariga ko‘ra, Rossiya Federatsiyasi Bosh prokuraturasi uni ekstraditsiya qilish haqida qaror qabul qildi.