Isroil Rossiya Il-20 halokatiga javob qaytarishidan xavfsiramoqda

Isroilliklar Suriyada Rossiyaning Il-20 rusumli samolyoti halokatga uchrashi ortidan ruslar tomonidan javob harakatlarini amalga oshirib, «Isroilning qanotlarini qayirishi»dan cho‘chimoqda. Bu haqda Isroildagi Haaretz nashrida yozilgan.

Xususan, mamlakat hukumati Rossiya Isroil harbiy-havo kuchlariga Suriya hududi ustidan uchishni taqiqlashidan xavfsiramoqda. Quddusdagilar bunday choralar faqat vaqtinchalikka joriy etilishiga umid qilishmoqda.

Nashrning qayd etishicha, Isroil uchun cheklov choralari Suriyada hukumat armiyasi hamda «Hizbulloh»ning erkin harakatlanishi uchun keng hudud taqdim etadi. Bu esa Eronning Suriyadagi pozitsiyalarini mustahkamlaydi.

17 sentabr kuni Suriyadagi Hmeymim aviabazasi Rossiyaning Il-20 radiolokatsion razvedka samolyoti ekipaji bilan aloqani yo‘qotgani xabar qilingandi. Keyinroq ushbu samolyot Suriya kuchlariga qarashli S-200 majmuasi raketasi yordamida urib tushirilgani ma'lum bo‘ldi.

Rossiya avvaliga isroilliklarning harbiy samolyotlari Suriyadagi obektlarga hujum qilib, javoban o‘t ochilganida Rossiya samolyoti ortiga bekingani haqida ma'lum qilgandi.

Bundan avvalroq Isroil zobitlari Il-20 samolyoti halokati bo‘yicha hisobotni taqdim etishgani to‘g‘risida xabar qilingandi.