OAV: Rossiya va Xitoy harbiy ittifoqi AQShning yarim asrlik strategiyasini o‘zgartiradi

Amerika Qo‘shma Shtatlari Rossiya-Xitoy harbiy hamkorligi bo‘yicha g‘oyaga e'tiborsizlik bilan yondashdi, deb yozmoqda Foreign Affairs jurnali.

Rossiyaning «Vostok-2018» harbiy mashqlari 17 sentabr kuni o‘z nihoyasiga yetdi. Tarixda ilk marotaba mashqlarda Xitoyning 3,2 ming harbiy xizmatchisi ishtirok etdi. Nashrning yozishicha, avval Moskva faqatgina Belarus kabi «harbiy ittifoqchilar»ini qo‘shma mashqlarga taklif qilgan.

Vashington harbiy sohada Rossiya-Xitoy ehtimoliy ittifoqiga e'tiborsizlik bilan yondashib keldi, deb yozadi Foreign Affairs. Pentagon rahbari Jyeyms Mettisdan qo‘shma mashqlar tufayli tashvishda emasligi haqida so‘rashganida, u: «Uzoq muddatli istiqbolda men Rossiya va Xitoyni bir-biriga bog‘laydigan narsa yetarli emas, deb hisoblayman», deb javob qaytardi.

AQSh Mudofaa vazirligi rahbarining pozitsiyasi G‘arbda umumqabul qilingan fikr bilan mos keladi. U yerdan hisoblashlaricha, Rossiya bilan Xitoy o‘rtasidagi ishonchsizlik strategik aloqalarni o‘rnatish uchun juda chuqurlik qiladi. Biroq, aslida bunday emas, deyiladi materialda. Ikki sobiq raqib o‘rtasidagi harbiy aloqalarning kengayishi haqiqatan ham ro‘y berishi mumkin, deya aniqlik kiritadi Foreign Affairs. Rossiya va Xitoy o‘rtasidagi nisbatan chuqur strategik hamkorlik AQShning yarim asrlik strategik hamda harbiy rejasini yo‘qqa chiqarib tashlashi mumkin, deya qo‘shimcha qilib o‘tgan nashr.

Rossiyaning «Vostok-2018» harbiy mashqlari Moskvaning Pekinga nisbatan strategik pozitsiyasini o‘zgartirishda eng muhim holat bo‘ldi - bu 2014 yildan so‘ng bosqichma-bosqich jadallashib bordi, deyiladi materialda.

Jurnalning ko‘rsatishicha, ikki davlatni birlashtiradigan omillar orasida Rossiya-Xitoy chegarasida tinchlikni saqlab qolish istagi bor. Rossiya va Xitoy o‘rtasidagi yaqinlashuvning ikkinchi omili ularning iqtisodiy o‘zaro bog‘liqligi hisoblanadi, deya ta'kidlanadi materialda. So‘nggisi - umumiy siyosiy maqsadlar. Har ikki rejim barqarorlikni qadrlaydi va hokimiyatni ushlab qolishni xohlaydi, deya aniqlik kiritadi nashr.

Umumiy manfaatlarga qaramasdan, Moskva Xitoyga ehtiyotkorlik bilan munosabatda bo‘lmoqda, deya qo‘shimcha qilib o‘tgan jurnal. Bu aholi soni kam bo‘lgan Uzoq Sharq va Xitoyning chegaraoldi provinsiyalari o‘rtasidagi demografik muvozanatga aloqador, deyiladi Foreign Affairs’dagi maqolada.

Rossiya xavotirlanishining yana bir sababi - Xitoyning Rossiya harbiy texnologiyalarini o‘g‘irlashi mumkin ekanida. Shuningdek, Pekinning Markaziy Osiyodagi ta'siri o‘sib borayotgani ham RF tashvishiga sabab bo‘lyapti, deya xulosa qiladi jurnal.

Eslatib o‘tamiz, avvalroq Pentagon uch davlatdan yadroviy tahdid borligini ma'lum qilgandi.