O‘zbekiston 2017 yilda AKT sohasida 135,6 mln dollarlik xizmatlarni eksport qildi

2017 yil yakunlariga ko‘ra, O‘zbekistonda axborot texnologiyalari bo‘yicha ko‘rsatilgan xizmatlar hajmi 7,9 trln so‘mni, eksport miqdori 135,6 mln AQSh dollarini, dasturiy ta'minotlarni ishlab chiqaruvchi kompaniyalar soni 1473tani tashkil etadi. 

Kompyuter dasturlashi bo‘yicha ko‘rsatilgan xizmatlar hajmi 436,6 mlrd so‘mni, bu boradagi xizmatlar eksporti 6,7 mln dollarni tashkil etgan. Bundan tashqari, iqtisodiyotning real sektoriga axborot-kommunikatsiya texnologiyalarini joriy qilish borasida 72ta yangi loyiha amalga oshirilgan. Bu haqda Toshkentda bo‘lib o‘tayotgan O‘zbekiston-Rossiya Ⅰ mintaqalararo hamkorlik forumi doirasida ma'lum qilindi, deb xabar qilmoqda Kun.Uz muxbiri.

Toshkent Xalqaro biznes markazining “O‘zekspomarkaz” pavilonlarida O‘zbekiston-Rossiya Ⅰ mintaqalararo hamkorlik forumi o‘z ishini davom ettirmoqda. “O‘zbekiston-Rossiya: o‘zaro foydali hamkorlikni kengaytirish va rivojlantirish” mavzusi bilan boshlangan biznes-nonushtada O‘zbekiston va Rossiyaning hukumat vakillari, ishbilarmon doiralari vakillari, delegatsiya a'zolari ishtirok etdi. 

“O‘zbekiston-Rossiya mintaqaviy hamkorligining yangi bosqichi: loyihalar va klasterlar” mavzusidagi ilk muhokamalar sessiyasi O‘zbekiston Iqtisodiyot vazirligi va Rossiya Iqtisodiy taraqqiyot vazirligi hamkorligida tashkil etildi. Unda O‘zbekiston va Rossiyaning ma'muriy-hududiy tuzilmalarini klasterli rivojlantirishning ustunliklari, Rossiya erkin iqtisodiy zonalari va sanoat texnoparklari salohiyatlaridan foydalanish, O‘zbekiston va Rossiya mintaqalararo aloqalarni kuchaytirish yo‘llari kabi masalalar muhokama qilindi. 

Forum doirasida o‘tkazilgan “Raqamli transformatsiya – O‘zbekiston va Rossiya uchun yangi reallik” mavzusidagi panel sessiyasida O‘zbekiston va Rossiyada raqamli iqtisodiyotni rivojlantirish masalalari muhokama qilindi. 

Panel sessiyada raqamli iqtisodiyotni yanada rivojlantirish salohiyati va imkoniyatlari, zamonaviy kosmik texnologiyalarni iqtisodiyotning turli sohalarida qo‘llash, davlat boshqaruvi tizimlarini raqamlashtirish, milliy axborot internet resurslarini rivojlantirish, raqamli iqtisodiyot sohasida mutaxassislarni tayyorlashning xalqaro tizimiga doir masalalar bo‘yicha fikrlar almashildi.