Maktablarda elektron jurnallar va kundaliklar joriy qilinadi

O‘zbekiston Xalq ta'limi vazirligi va Rossiyaning “Dnevnik.ru” kompaniyasi umumta'lim maktablarida elektron jurnallar va kundaliklarni joriy qilish bo‘yicha loyihani amalga oshiradi. Bu haqda Xalq ta'limi vazirligi matbuot xizmati ma'lum qildi.

KUNDALIK loyihasi maktablarda o‘zlashtirish va davomat hisobini yuritish tizimini tatbiq qilishni ko‘zda tutadi. Tashabbus davlat-xususiy sektor hamkorligi doirasida amalga oshiriladi.

KUNDALIK raqamli ta'lim platformasi “Dnevnik.ru”ning hozirda Rossiya maktablarida tatbiq qilinib, adaptatsiya qilingan axborot tizimining texnologik o‘zagi negizida ishlab chiqiladi.

Tizim onlayn tartibda darslar jadvalini tuzish, o‘qituvchilarning darslar bo‘yicha rejalarini shakllantirish, o‘quvchilarning davomati va o‘zlashtirishi hisobini elektron shakldagi jurnallar va kundaliklarda olib borish, ta'lim tashkilotlari va ta'limni boshqarish idoralarini statistik hisobotni shakllantirish vositalari bilan ta'minlashga imkon beradi. 

Tizim o‘quvchilar va ota-onalarga kecha-yu kunduz baholar va uy topshiriqlarini ko‘ra olish, samarali muloqot uchun himoyalangan ijtimoiy tarmoq, onlayn-kutubxona va mediatekadan foydalanishni taklif qiladi. 

O‘zbekiston Xalq ta'limi vaziri o‘rinbosari Sarvar Boboxojayev “Xalq ta'limi vazirligining asosiy maqsadlaridan biri o‘qituvchilar ishlashi uchun qulay sharoitlarni yaratish hisoblanadi. Zamonaviy texnologiyalarni qo‘llab, maktablarda qog‘ozda hisobot yuritish hajmini va bu bilan bog‘liq holda o‘qituvchilarga tushadigan yuklamani qisqartirmoqchimiz. Shu bilan birga ta'lim jarayonini boshqarish va o‘quvchilarning davomati va o‘zlashtirishi bo‘yicha vosita yaratamiz”, deb aytdi. 

O‘z navbatida “Dnevnik.ru” rahbari Gavriil Levi KUNDALIK O‘zbekiston-Rossiya munosabatlarini rivojlantirishdagi muhim loyihalardan biri bo‘lishiga ishonchi komilligini aytgan. “Bizning hamkorlik O‘zbekistonda ta'limning rivojlanishiga va yuqori malakali mutaxassislarni tayyorlashda ko‘mak beradi”, deb ta'kidlab o‘tgan.