Hokimiyat stadionni buzib, o‘rniga do‘konlar qurmoqchi: bu ishlarda qanday manfaat bor?

KUN.UZ saytida Farg‘ona viloyatining Oltiariq tumanidagi dehqon bozori mojarosi haqida bir emas, ikki bor maqola e'lon qilindi.  “Bozordagi do‘konlar tunda buzib tashlandi. Oltiariqliklar haqiqat izlaydi” hamda “O‘raga nima tushdiki, Oltiariq bozori muammosi “guldur-gup” bo‘ldi?...” sarlavhasi ostida berilgan maqolalarda dehqon bozorining buzilishi va bu jarayonda tadbirkorlarning huquqari oyoqosti bo‘lgani bayon etilgan edi.

Kuni kecha saytimizga Oltiariq tumanidan yana bir shikoyat kelib tushdi. Bu tumandagi markaziy futbol maydonining buzilishi haqida. Biz bejiz so‘zimizni Oltiariq dehqon bozori haqida boshlamadik. Boisi futbol maydoni bilan bog‘liq murojaat aynan bozor mojarosi bilan uzviy bog‘liq. Ijodiy guruhimiz tumanga yo‘l oldi va murojaatni atroflicha o‘rganib chiqdi. Dastlab bizni tuman Bolalar sport majmuasi murabbiyi Xayrullo Mirzajonov qarshi oldi.

Youtube'da ko‘rish

{Yii::t(}

O'tkazib yuborish 6s

O'tkazib yuborish

Mover'da ko‘rish (tas-ix)

Dastavval buzilish hududiga tushgan otalar choyxonasini ko‘zdan kechirdik. 100 yillik chinorlar, oltiariqlik yoshu keksalarning qadrdon maskani ayni buzilishga tushgan hududda joylashgan. Shundan so‘ng, murabbiy bizni futbol maydoniga boshladi.

- Ushbu o‘yingoh 1966 yilda xalq tomonidan hashar yo‘li bilan qurilgan. 2013 yilda bolalar sporti jamg‘armasi tomonidan mablag‘ ajratilib, qayta ta'mirlangan. Hozir stadionimizda barcha sharoitlar bor, u FIFA, Olimpiya standartlariga to‘liq javob beradi. Maydonning buzilishini bozor buzilishidan deb bilaman. Chunki stadionning tribunalari buzilib, ularning o‘rniga do‘kon quriladi degan gap-so‘zlar chiqyapti. Ammo bundan xalq butunlay norozi. Milliy merosimiz bo‘lgan chinorlar, otalar choyxonasi, stadion – to‘rtta do‘konni deb bizdan mana shu qadriyatlarimizni tortib olishmoqchi. Byudjyetlarida mablag‘ bo‘lsa, bozorni qurib bitkazishmaydimi, chala buzilib, vayron holda yotibdi.

Oltiariqdagi futbol maydoni bugun havaskor va professional sportchilarning sevimli maskani, qator yulduzlarni kashf etgan dargoh. Bolalar sport majmuasining bir qismi bo‘lgan bu maydonga tuman mutasaddilari turli tadbirlardagina keladi, boshqa vaqt esa bu maydonni o‘z kuchimiz bilan ta'mirlab, foydalanishga yaroqli holda ushlab turamiz, - deydi sport majmuasi murabbiyi Xayrullo Mirzajonov.

Shundan so‘ng, Oltiariq tumani hokimining joriy yil 25 sentabrdagi 3076-sonli  qarori e'tiborimizni tortdi. Unda dehqon bozori hududidagi tadbirkorlarni boshqa joyga ko‘chirish hamda hozirgi kunda tuman markaziy o‘yingohi davlat standartlariga mos kelmaganligi sababli  o‘yingohni qayta moslashtirish ishlari tashkil etilishi yuzasidan ishchi guruhini tasdiqlash haqida so‘z boradi. Shuningdek, qarorda bu borada tegishli tashkilotlarga kerakli topshiriqlar berilgan. “Oltiariq” mahalla fuqarolar yig‘ini raisi Muxtor Isroilov bilan tuman hokimining mazkur qarori yuzasidan suhbatlashdik.

- Ushbu qarorda hech qanday manba yo‘q, quruq gaplar. Buzasan, tamom deyilgan. Tumanning tashkilotlari hammasi qo‘l qo‘yib bergan. “Kelishildi” degan joyiga. Ammo nimaga kelishilayotganini o‘zlari ham bilishmaydi. Stadion buzilishi munosabati bilan biror xat ham berishmagan.

Biz mazkur murojaat yuzasidan Oltiariq tuman hokimligida bo‘ldik. Biroq tuman hokimi yordamchisi, tuman hokimining qurilish ishlari bo‘yicha o‘rinbosari, tuman arxitektori ushbu murojaat bo‘yicha biron axborot berishni istamadi. Faqatgina tuman arxitektori tasvir ortida tuman markaziy o‘yingohi shamol yo‘nalishiga noto‘g‘ri tushganligini, sportchi koptokni tepganda shamol ta'sir o‘tkazishini, shuning uchun tuman hokimligi mutasaddilari o‘yingohni shimol va janub yo‘nalishiga moslab qurish rejalashtirilganligi tufayli buzish haqida qarorga kelganligini  aytdi.

Shu o‘rinda qator savollar tug‘iladi:

- Tuman hokimligi qarorida ta'kidlanganidek, o‘yingohning davlat standartlariga mos kelmasligi deganda aynan qanday standartlar nazarda tutilgan?

- Yaqindagina O‘zbekiston bolalar sportini rivojlantirish jamg‘armasi mablag‘lari hisobidan otning kallasidek keladigan pulga kapital ta'mirdan chiqarilib, foydalanishga topshirilgan o‘yingoh qanday qilib “davlat standartlari”ga mos kelmay qoladi? Nahotki, bu haqida ta'mirlashdan avval o‘ylab ko‘rilmagan bo‘lsa?

- Tuman arxitektori ta'kidlaganidek, “o‘yingoh shamol yo‘nalishiga noto‘g‘ri tushganligi, maydondagi to‘p yo‘nalishiga shamol ta'sir o‘tkazishi” butun boshli maydonning buzilib, qayta qurilishi uchun qay darajada sabab bo‘la oladi?

Darvoqe, tuman hokimining qarorida “markaziy o‘yingoh davlat standartlariga mos kelmasligi” deb bayon etilgan. Futbol maydonlariga nisbatan FIFA (Xalqaro futbol federatsiyasi) belgilagan standartlari mavjud, biroq bu borada davlat standartlari mavjudligi haqida eshitmagan ekanmiz.

Shunday qilib, birgina tuman hokimining qarori bilan oltiariqliklar uchun qadrdon bo‘lib qolgan markaziy o‘yingoh, unga yondosh uzoq asrlik otalar choyxonasi, yuz yillik chinorlar omonat bo‘lib qolgandek, go‘yo.

Maqola avvalida tuman markaziy o‘yingohiga qo‘shni bo‘lgan dehqon bozori haqida so‘z ochgandik. Markaziy o‘yingoh buzilishining asl sababi dehqon bozoridagi muammoga yechim topish emasmikin? Boisi tunda do‘konlari buzilgan tadbirkorlar mana bir yil o‘tsa hamki sarson. Tuman hokimligi tadbirkorlarga aynan buzilishi ko‘zda tutilgan markaziy o‘yingoh hududidan joy bermoqchidir balki...

Oltiariqliklar oldidagi bir muammo yechim topmay ikkinchisi tug‘ilmoqda.

Umid qilamizki, Farg‘ona viloyat hokimi bu muammoga ijobiy yechim topadi va oltiariqliklarni rozi qiladi.

O‘zbekiston Respublikasida jismoniy tarbiya va sport sohasida yagona davlat siyosatini amalga oshiruvchi davlat boshqaruvi organi hisoblangan Jismoniy tarbiya va sport vazirligi Oltiariqdagi markaziy o‘yingohning taqdiriga befarq qolmaydi va bu muammoni ijobiy hal etish yo‘llari ustida ishlaydi, deb umid qilib qolamiz.

Xurshid Daliyev