«Arsenal» «Liverpul»ga qarshi o‘yinda seriyasini davom ettirdi

Londonning «Arsenal» klubi Angliya Premer-ligasining 11-turida «Liverpul» bilan o‘ynadi. Londondagi «Emireyts — Eshberton Grouv» stadionida kechgan uchrashuvda kuchlar teng keldi - 1:1.

O‘yindagi hisob 61-daqiqada «Liverpul» yarimhimoyachisi Jyeyms Milner tomonidan ochildi. 82-daqiqada esa mezbonlar hujumchisi Aleksandr Lyakazett hisobni tenglashtiruvchi golni urdi.

Bu o‘yindagi 1 ochko evaziga «Liverpul» ochkolari sonini 27taga yetkazgan holda hozircha birinchi o‘ringa ko‘tarilgan, «Arsenal» 23 ochko bilan 4-o‘rinda. 26 ochkoga ega «Manchester Siti» tur doirasidagi o‘yinini 5 noyabr kuni «Sauthempton»ga qarshi o‘tkazadi, 5-o‘rindagi «Tottenhem» ham hali 11-tur uchrashuvini o‘tkazmadi, 22 ochkoga ega jamoa «Vulverhempton»ga qarshi o‘yin natijasiga ko‘ra 4-o‘ringa ko‘tarilib olishi mumkin.

«Arsenal» barcha turnirlar doirasidagi mag‘lubiyatsiz seriyasini davom ettirdi (14 o‘yin), «Liverpul» qatorasiga 3 g‘alabadan keyin ilk bor ochko yo‘qotdi.

APLning keyingi turida «Liverpul» «Fulxem»ni qabul qiladi, «kanonirlar» Londonda «Vulverhempton»ga qarshi o‘ynaydi. Ikki uchrashuv ham 11 noyabrga belgilangan.

Angliya chempionati
11-tur
Arsenal – Liverpul 1:1 (0:0, 1:1)
Gollar: 0:1 – 61 Milner, 1:1 – 82 Lyakazett.
Arsenal – Leno, Xolding, Kolashinats (Uelbek, 81), Bellerin, Mustafi, Mxitaryan (Ivobi, 68), Chaka, Torreyra, O‘zil, Obameyang (Remzi, 73), Lyakazett.
Liverpul – Alisson, Gomes, Robertson, Aleksander-Arnold, van Deyk, Milner, Fabino, Veynaldum, Mane, Saloh (Matip, 90), Firmino (Shakiri, 80).
Ogohlantirishlar: Fabino (52), Lyakazett (83).