Xorazm viloyati forumda eng faol: 13 million dollarga yaqin investitsion kelishuv imzolandi

Xorazm viloyati hokimligi Turizm sohasiga investitsiya kiritishga doir birinchi xalqaro forum doirasida 13 million dollarga yaqin investitsion kelishuvni imzoladi.

“Xalqaro forum doirasida hozirga qadar xorijiy va mahalliy sarmoyadorlar bilan jami 12,5 million dollarlik investitsion shartnomalarni imzoladik. Rossiyaning “Turkezm” kompaniyasi, Qozog‘istonning “Kazdevelopinvest” hamda “Grand develop” MChJ, “Shiddat monolit” xususiy korxonasi, “Xorazm Zafar Invest” MChJ, “Xorazm tur plyus” MChJ va  “RentServiceGroup” XK bilan Xorazm viloyati turizm infratuzilmalari rivojiga sarmoya kiritish borasida kelishuvlarga erishildi”, - deya ma'lum qildi Xorazm viloyati Turizmni rivojlantirish departamenti direktori vazifasini bajaruvchi Azizbek Polvonov KUN.UZ muxbiriga.

Ta'kidlash joizki, Xorazm viloyati xalqaro forum doirasida eng faol ishtirok etayotgan hududlardan biri bo‘lib, ushbu hokimlikdan jami 71 ta loyiha investorlarga taqdim etilgan. Ular orasida mehmonxonalar, akvanarium, yopiq va ochiq akvaparklar, qishki bog‘, gipermarketlar, ekstremal sport kompleksi, golf majmuasi, mavzuiy park va boshqalar bor.

Taqdim etilayotgan eng diqqatga sazovor loyihalardan biri – O‘zbekistondagi eng baland manzarali maydonga ega “charxpalak” bo‘lib, u amalga oshirilgan taqdirda, 100 metr balandlikdan Xivaning butun go‘zalligidan zavq olish mumkin bo‘ladi.