Samarqand forumi mintaqa xavfsizligi va barqarorligiga xizmat qiladi – Natalya German

Inson huquqlari bo‘yicha Samarqand Osiyo forumi mintaqa xavfsizligi, barqarorligi va rivojiga hissa qo‘shadi. BMT bosh kotibi maxsus vakili, Markaziy Osiyoda preventiv diplomatiya BMT mintaqaviy markazi rahbari Natalya German forum doirasida shunday fikrni bildirdi, deb xabar qilmoqda KUN.UZ muxbiri.  

«Biz Samarqandda Inson huquqlari umumjahon deklaratsiyasi qabul qilinganining 70 yilligi arafasida to‘planib turibmiz. Mazkur forum, BMT bosh kotibi Antonio Guterrish qayd etganidek, o‘z vaqtida tashkil etildi. 

Men esa, o‘z ma'ruzamda, bir yil avval, go‘zal Samarqand shahrining aynan ushbu majlislar zalida yana bir e'tiborga molik uchrashuv, prezident Mirziyoyev tashabbusi bilan tashkil etilgan xalqaro konferensiya bo‘lib o‘tganini yodga oldim. U Markaziy Osiyo mamlakatlarining mintaqaviy hamkorligining yangi bosqichini boshlab bergan edi. O‘shanda biz Samarqandning hamkorlik ruhi xususida so‘z yuritgan edik», -  BMT bosh kotibi maxsus vakili. 

Uning fikricha, mintaqada oliy darajadagi tashriflarning ko‘payib borayotgani ham mintaqaning nafaqat turli jabhalar, balki inson huquqlari borasidagi ko‘rsatkichlarini yaxshilash imkonini beradi. 

«Aytishim mumkinki, bugungi forum ham ayni o‘sha hamkorlik ruhi asosida bo‘lib o‘tmoqda va unga mos kelmoqda. O‘tgan vaqt mobaynida ko‘p narsa o‘zgardi, albatta. Biroq, BMT bosh kotibligining mintaqaviy byurosi dunyoning ushbu hududida mintaqaviy hamkorlik haqiqatdan ham o‘zining yangi bosqichiga kirganini e'tirof etadi. Bu hamkorlik o‘zaro hamkorlikning barcha jabhalari, shu jumladan inson huquqlari va erkinliklari sohasida ham kuzatilmoqda. 

Buni davlat rahbarlari, turli vazirlik va idoralar darajasida o‘zaro tashriflarning ko‘payishida ham ko‘rish mumkin. Bunday ijobiy muhit esa, o‘z navbatida, mintaqa mamlakatlarining inson huquqlari va erkinliklari sohasida ham sezilarli olg‘a siljishlari uchun ajoyib maydon bo‘lib xizmat qilishiga umid uyg‘otadi. 

BMTning 2030-yilgacha Barqaror rivojlanish dasturida belgilangan vazifalar ijrosini ta'minlashda aynan inson huquqlari va erkinlarini ham ta'minlash muhim o‘rin tutadi. O‘ylaymanki, ushbu forum mintaqa xavfsizligi, barqarorligi va rivojiga hissa qo‘shadi», - dedi Natalya German.

Shuhrat Shokirjonov, Tolib Rahmatov, Ruslan Ramazonov
KUN.UZ muxbirlari