Yevroittifoq Markaziy Osiyo davlatlari taraqqiyoti uchun 124 mln yevro ajratadi

Yevropa ittifoqi Markaziy Osiyodagi turli loyihalarni rivojlantirish uchun 124 million yevro investitsiya kiritishni mo‘ljallamoqda. Bu haqda Yevrokomissiya matbuot xizmati “YeI – Markaziy Osiyo” shaklidagi tashqi ishlar vazirlari uchrashuvi yakunlariga ko‘ra ma'lum qildi. 

Xabarda aytilishicha, YeI dasturlari, jumladan, ish o‘rinlari yaratish va mintaqa davlatlarining barqaror rivojlanishiga qaratilgan.

Xalqaro hamkorlik va taraqqiyot bo‘yicha YeI komissari Neven Mimitsaning so‘zlariga ko‘ra, Qirg‘izistondagi umumiy ta'lim sohasini rivojlantirishga 36 mln yevro ajratiladi.

Umumiy qiymati 88 mln yevro bo‘lgan yana olti dastur esa O‘zbekiston, Qozog‘iston, Qirg‘iziston, Tojikiston, Turkmanistonda xususiy sektor, savdoni rivojlantirish va atrof-muhitni asrash sohalarini rivojlantirishga yo‘naltiriladi.