OAV: Trampga qarashli kompaniya Putinga narxi 50 million dollar turadigan koshona sovg‘a qilmoqchi bo‘lgan

AQSh prezidenti Donald Trampning The Trump Organization kompaniyasi Rossiya prezidenti Vladimir Putinga Moskvada qurilishi rejalashtirilgan «Tramp-Tauer» binosidan pentxaus (binoning eng yuqori qavatida joylashgan koshonasifat xonadon) sovg‘a qilmoqchi bo‘lgan. Bu haqda Buzzfeed News xabar bermoqda.

Qiymati 50 million dollarlik bu sovg‘adan maqsad rossiyalik boylarni bo‘lajak binodan xonadon sotib olishga qiziqtirish bo‘lgan.

«Oligarxlar Putin yashaydigan uyda yashash uchun qatorlashib navbatga turgan bo‘lishardi», degan Moskvada balandligi 100 qavatli «Tramp-Tauer» binosini qurish tashabbuskori bo‘lgan biznesmen Feliks Sater.

Tramp bu g‘oyadan xabardor bo‘lganmi-yo‘qmi, noma'lum, lekin BuzzFeed’ning yozishicha, o‘sha paytda uning advokati bo‘lgan Maykl Koen biznesmenni Moskva bilan muzokaralardan xabardor qilib turgan.

Nashrning AQSh huquqni muhofaza qilish organlaridagi manbalarga tayanib yozishicha, Koen Rossiya prezidentining matbuot kotibi Dmitriy Peskovning vakili bilan qurilish rejasini muhokama qilgan. 29 noyabr kuni Koen loyiha muhokamasi Tramp prezidentlikka nomzod bo‘lganidan so‘ng ham davom etganini tan olgan.  

AQSh prezidenti uni yolg‘onchilikda aybladi. Trampning so‘zlariga ko‘ra, Koen qamalish muddatini qisqartirish uchun yolg‘on gapirmoqda. U soliq to‘lashdan qochish va boshqa jinoyatlarda ayblanmoqda.