Normativ-huquqiy hujjatlar loyihalari muhokamasi portalida Vazirlar Mahkamasining “Farg‘ona viloyatining Furqat tumanini ijtimoiy-iqtisodiy rivojlantirish bo‘yicha qo‘shimcha chora-tadbirlar to‘g‘risida”gi qarori loyihasi joylashtirildi.
Hujjat bilan quyidagilar:
2018-2019 yillarda Furqat tumanida kafolatli ish o‘rinlari tashkil etish hamda sanoat, qishloq xo‘jaligi va xizmatlar ko‘rsatish sohasini rivojlantirish loyihalarining manzilli ro‘yxati;
2019-2020 yillarda ta'lim muassasalari, sog‘liqni saqlash, madaniyat va sport obektlarni qurish, rekonstruksiya qilish va kapital ta'mirlash bo‘yicha chora-tadbirlar rejasi tasdiqlanishi mumkin.
Farg‘ona viloyati hokimligi, O‘zbekiston Respublikasi Investitsiyalar bo‘yicha davlat qo‘mitasi, Iqtisodiyot vazirligi, Xususiylashtirilgan korxonalarga ko‘maklashish va raqobatni rivojlantirish davlat qo‘mitasining “Navbahor” mahalla fuqarolar yig‘ini hududida joylashgan tuman hokimligi balansidagi sobiq Navbahor ulgurji savdo bazasi negizida sovitish kameralari, konsignatsiya omborlari, qishloq xo‘jaligi mahsulotlarini qayta ishlash, o‘rab-joylashtirish, ularni saralash, saqlash va boshqa zarur infratuzilmani o‘z ichiga oladigan, umumiy maydoni 1,7 gektar bo‘lgan temir yo‘l transporti hamda avtomobillarda yuk tashish uchun logistika markazini tashkil etish to‘g‘risidagi taklifi ma'qullanishi mumkin.
Farg‘ona viloyati hokimligi O‘zbekiston Respublikasi Investitsiyalar bo‘yicha davlat qo‘mitasi bilan birgalikda salohiyatli investorlarni jalb etgan holda logistika markazini tashkil etish bo‘yicha loyihani 2019 yilning yakuniga qadar amalga oshirilishini ta'minlaydi.
Farg‘ona viloyati hokimligi, O‘zbekiston Respublikasi Madaniyat vazirligi, Xususiylashtirilgan korxonalarga ko‘maklashish va raqobatni rivojlantirish davlat qo‘mitasi va “Hidoyatxon Sardorbek Sanjarbek Bog`i” bog‘dorchilik yo‘nalishidagi fermer xo‘jaligining Furqat tumanida davlat-xususiy sheriklik asosida zamonaviy madaniyat va istirohat bog‘ini barpo etish loyihasini amalga oshirish to‘g‘risidagi taklifiga rozilik berilishi hamda O‘zbekiston Respublikasi Madaniyat vazirligi loyihada davlat sherigi sifatida ishtirok etishi belgilanishi mumkin.
Farg‘ona viloyati hokimligi O‘zbekiston Respublikasi Madaniyat vazirligi bilan birgalikda ikki oy muddatda joylashgan hudud va hajmi nuqtai-nazaridan zamonaviy madaniyat va istirohat bog‘ini barpo etish uchun maqbul bo‘lgan, shu jumladan aholi tashrifi uchun qulay joydan 5 gektar yer maydonini madaniyat va istirohat bog‘i barpo etish loyihasiga kamida 1,0 mln. AQSh dollariga teng miqdorda investitsiya kiritish, uni 2019 yil oxirigacha ishga tushirish, kamida 80 ta ish o‘rni yaratish sharti bilan ajratilishini ta'minlaydi.
