O‘zbekiston zamonaviy beshkurash federatsiyasi Frankfurtda muzokara olib bordi

19 yanvar kuni Germaniyaning Frankfurt shahrida O‘zbekiston zamonaviy beshkurash federatsiyasi raisi Bahromjon Gaziyev va Zamonaviy beshkurash xalqaro ittifoqi prezidenti doktor Klaus Shorman o‘rtasida uchrashuv bo‘lib o‘tdi.

Uzoq muddatli va o‘zaro manfaatli munosabatlarni rivojlantirish masalasi muhokama qilingan uchrashuvda Bahromjon Gaziyev O‘zbekiston zamonaviy beshkurashining holati va istiqbollari haqida batafsil so‘zlab berdi. 

Muloqotda ko‘p yillardan buyon mamlakatimizda ushbu sport turiga yetarlicha e'tibor berilmagani va shuning uchun rivojlana olmagani, hozirda esa vaziyat o‘zgargani ta'kidlangan.

«O‘zbekiston zamonaviy beshkurash federatsiyasi va Milliy olimpiya qo‘mitasining birgalikdagi sa'y-harakatlari natijasida qisqa vaqt ichida kuchli murabbiylar va bir nechta iqtidorli sportchi topishga muvaffaq bo‘ldik va Tokio-2020 Olimpiadasida ishtirok etish uchun haqiqiy imkoniyatlar paydo bo‘ldi», – degan Bahromjon Gaziyev.

Klaus Shormann, o‘z navbatida, O‘zbekiston zamonaviy beshkurashini rivojlantirish va ommalashtirishga yordam berishga va'da bergan.

Uchrashuvda O‘zbekiston sportchilarini zarur jihozlar bilan ta'minlash va sport majmualarini mashg‘ulotlar uchun zamonaviy uskunalar bilan jihozlash masalalari ham muhokama qilingan.

Klaus Shormann O‘zbekistonda ushbu sport turini rivojlantirish borasida o‘z tavsiya va takliflarini bergan.

«O‘zbekistonda  yaqin vaqt ichida O‘zbekiston zamonaviy beshkurash maktabi ochiladi. Qilichbozlik zali, suzish havzalari, yugurish yo‘laklari, stadionlar, konkur maydoni va o‘q otish uchun mo‘ljallangan maydonlarni o‘z ichiga olgan, xalqaro standartlarga mos zamonaviy sport bazasini qurish rejalashtirilgan. Kelgusida ushbu sport bazasida nafaqat zamonaviy beshkurash, balki boshqa sport turlari bo‘yicha ham xalqaro musobaqalar o‘tkaziladi», deyilgan federatsiya matbuot xizmati xabarida.

O‘zbekiston zamonaviy beshkurash federatsiyasi raisi Osiyo zamonaviy beshkurash konfederatsiyasi prezidenti Sangvo Park bilan ham uchrashuv o‘tkazishni rejalashtirgan. Hozirgi vaqtda uchrashuvning aniq sanasi, joyi va vaqtini belgilash bo‘yicha muzokaralar olib borilmoqda.