2019 yilda Mirziyoyev va Erdo‘g‘an raisligida O‘zbekiston - Turkiya siyosiy muloqotining muhim tadbiri bo‘lib o‘tadi

2019 yilning 30 yanvar kuni O‘zbekiston Respublikasi tashqi ishlar vaziri Abdulaziz Komilov Turkiya Respublikasining favqulodda va muxtor elchisi etib tayinlangan Mehmet Sureyya Erni qabul qildi.

TIV xabariga ko‘ra, ishonch yorliqlari nusxasini qabul qilib, vazir elchini tayinlov bilan samimiy qutlagan va unga muvaffaqiyatlar tilagan.

Mehmet Sureyya Er qutlov uchun minnatdorchilik bildirdi va mamlakatlarimiz hamda xalqlarimiz o‘rtasidagi aloqalarni mustahkamlash va rivojlantirishga munosib hissa qo‘shish uchun bundan avvalgi faoliyati, jumladan Turkiya hamkorlik va muvofiqlashtirish agentligi (TIKA) prezidenti o‘rinbosari lavozimidagi barcha tajribasidan foydalanganligiga ishontirdi.

Suhbat chog‘ida ko‘p qirrali ikki tomonlama hamkorlikning dolzarb masalalari muhokama qilindi.

O‘tgan yil bahorida bo‘lib o‘tgan prezident Rajab Toyyib Erdo‘g‘anning O‘zbekistonga davlat tashrifi va prezident Shavkat Mirziyoyev bilan samarali muzokaralari davlatlararo munosabatlarda yangi sahifa ochgani ta'kidlandi.

O‘zbekiston tomonining ma'lumotlariga ko‘ra, 2018 yili o‘zaro savdo aylanmasi hajmi 40 foizga o‘sib, 2 milliard 172 million AQSh dollarini tashkil etdi. Mamlakatga 75 mingga yaqin Turkiya fuqarolari tashrif buyurdi, bu esa o‘tgan yilga qaraganda deyarli ikki baravar ko‘pdir. Bu kabi ijobiy o‘zgarish o‘zaro munosabatlarning boshqa sohalarida ham kuzatilmoqda.

Uchrashuvda boshlangan yildagi qo‘shma tadbirlar rejasi va kun tartibi yuzasidan fikr almashildi, ushbu tadbirlar orasida ikki davlat rahbarlarining raisligida Strategik hamkorlik bo‘yicha Oliy kengashning birinchi majlisi markaziy hisoblanadi. Shu nuqtai nazardan, 2019 yilda O‘zbekiston-Turkiya siyosiy muloqotining asosiy voqeasiga tayyorgarlik ko‘rish bo‘yicha takliflar ko‘rib chiqildi.