Samarqanddagi kasb-hunarga o‘qitish markaziga Janubiy Koreyaning 1,1 mln dollarlik grant mablag‘i ajratilmoqda

Samarqand shahridagi kasb-hunarga o‘qitish markazida joriy yilning 25 fevral kuni o‘zaro anglashuv memorandumi imzolash marosimi bo‘lib o‘tdi. Bu haqda Kun.uz’ning Samarqanddagi o‘z muxbiri xabar qilmoqda.

O‘zbekiston Respublikasi Bandlik va mehnat munosobatlari vazirligi, KOICA (Koreya Xalqaro Hamkorlik Agentligi), Keimyung kollej universiteti va Samarqand kasb-hunarga o‘qitish markazi hamkorlikda 2019–2022 yillarda «KOICA public-private partnership project» markazning ta'lim salohiyatini mustahkamlash orqali Samarqand viloyatida ishchilarni malakasini oshirish va ishga joylashtirishni kuchaytirish» loyihasi uchun KOICA 900 ming AQSh dollari, Keimyung kollej universiteti 200 ming dollar — jami 1 mln 100 ming dollarlik grant mablag‘lari ajratilmoqda.

Ushbu loyiha doirasida Samarqand kasb-hunarga o‘qitish markazida «Mashinasozlik texnologiyasi» (SNS), «Kompyuter dizayneri» yo‘nalishlari va «Samarqand Startap biznes inkubator markazi» tashkil etilmoqda.

Shu munosabat bilan Bandlik va mehnat munosabatlari vazirining o‘rinbosari Bahodir Umrzoqov, KOICA’ning Toshkentdagi ofisi direktori Son Song Il va Keimyung kollej universiteti sanoat bilan hamkorlik departamenti direktori Kim Yonkab o‘zaro anglashuv memorandumini imzolashdi.

Bahodir Umrzoqov yurtimizdagi kasb-hunarga o‘qitish markazlarining rivojlanib borishida o‘zlarining beminnat xizmatlarini ayamay kelayotgan Janubiy Koreya hukumatiga va KOICA’ga o‘z minnatdorchiligini bildirdi. KOICA’ning Toshkentdagi ofisi direktori Son Song Il Samarqand Startap biznes inkubator markazi kelgusida aholiga katta xizmat ko‘rsatishiga ishonib, O‘zbekistonda bunday loyihalarni amalga oshirishga xar doim tayyor ekanligini bildirdi.

Qayd etib o‘tish joizki, memorandum imzolangunga qadar mazkur markazda KOICA tomonidan O‘zbekistonda tashkil etilgan kasb-hunarga o‘qitish markazlari ishtirokida Kasblar bo‘yicha musobaqa bo‘lib o‘tdi. Unda Toshkent, Samarqand va Shahrisabz shahridagi kasb-hunarga o‘qitish markazlari hodimlari va talabalari qatnashdilar.

Musobaqada talabalar avtomobillarni ta'mirlash va texnik xizmat ko‘rsatish, elektronika va asbobsozlik, payvandlash ishlari texnigi, axborot texnologiyalari yo‘nalishi bo‘yicha kuch sinashdilar.

Berilgan vaqt va musobaqa shartlari tugagach, hakamlar tomonidan g‘oliblar aniqlandi. G‘oliblarga qimmatbaho sovg‘alar tarqatildi.