Samarqandda Bahodir Yalangto‘shga bag‘ishlangan xalqaro konferensiya bo‘ladi

Samarqand viloyat matbuot markazida «Bahodir Yalangto‘shning Markaziy Osiyo ijtimoiy-siyosiy va madaniy hayotida tutgan o‘rni» mavzusida Samarqandda yaqinda o‘tadigan xalqaro konferensiya va «Sharq taronalari» XII xalqaro musiqa festivaliga tayyorgarlik ko‘rish va uni o‘tkazishga bag‘ishlangan matbuot anjumani bo‘lib o‘tdi. Bu haqda Kun.uz muxbiri xabar bermoqda.

Unda viloyat hokimining yoshlar siyosati, ijtimoiy rivojlantirish va ma'naviy-ma'rifiy ishlar bo‘yicha o‘rinbosari Rustam Qobilov jurnalistlarga ma'lumot berdi va savollarga javob qaytardi. Anjuman mobaynida kelayotgan loyihalardan namunalar namoyish qilindi.

Samarqand shahrining o‘tmishdagi hokimi, Registon majmuasidagi Sherdor va Tillakori madrasalari bunyodkori hisoblanadigan Bahodir Yalangto‘shning harbiy salohiyati, bunyodkorlik ishlariga bag‘ishlangan «Bahodir Yalangto‘shning Markaziy Osiyo ijtimoiy-siyosiy va madaniy hayotida tutgan o‘rni» mavzusidagi xalqaro konferensiya shu yilning yil 20 iyun kuni Samarqand shahrida o‘tkazilishi e'lon qilindi.

Mana shu sanagacha Samarqand shahrining miloddan avvalgi davrda paydo bo‘lgan onlaridan boshlab bugungi kunigacha qamrab olgan yangi kitob-albom bosmadan chiqishi ham e'lon qilindi.

Shuningdek, o‘n ikkinchi marta tashkillashtirilayotgan «Sharq taronalari» xalqaro festivaliga tayyorgarlik ishlari haqida ma'lumot berildi. Xususan, uning logotipi zamonaviyroq qilib boshqatdan tayyorlanayotgani, biroq yakuniy variant hozircha tasdiqlanmagani e'lon qilindi.

Jurnalistlar har ikki muhim xalqaro tadbirni o‘tkazish yuzasidan o‘zlarini qiziqtirgan savollarga javob olishdi, shuningdek, tashkiliy qo‘mita xalqaro anjumanlarni o‘tkazishda, xususan, jurnalistlar uchun zarur shart-sharoitlar yaratilishida xorijiy davlatlarning ayrim ijobiy tajribasidan foydalanishi taklif etildi.