Turkiya kompaniyasi Namanganda zamonaviy turistik majmua barpo etadi

Namangan viloyatining Nanay qishlog‘ida zamonaviy turistik majmua barpo etish bo‘yicha amaliy ishlar boshlab yuborildi, deb xabar berdi Namangan viloyati hokimligi matbuot xizmati.

Xabarda aytilishicha, viloyat hokimligida mazkur sayyohlik zonasi loyihasini tayyorlashga jalb etilgan Turkiyaning “Idealist” me'morchilik va muhandislik kompaniyasi tomonidan taqdimot o‘tkazildi.

Ijrosi uzoq muddatga mo‘ljallangan loyihadan sayyohlik infratuzilmasining ko‘plab obektlari o‘rin olgan. Ulardan biri Nanay kichik turizm markazi 27,9 gektar maydonda barpo etiladi. Markaz tarkibiga 251 o‘rinli to‘rt yulduzli va 549 o‘rinli besh yulduzli mehmonxona, 4000 o‘rinli qishki va yozgi tomoshalar zali, ko‘rgazmalar markazi, hunarmandlik ustaxonalari, shuningdek, qator ko‘ngilochar inshootlar kiritilgan. 

Nanay turizm markazi esa 14,5 gektar hududda joylashib, unda ikkita besh yulduzli mehmonxona, 549 kishiga mo‘ljallangan ustki nafas yo‘llari va diabet kasalliklarini davolash sihatgohi, 78 ta villa-mehmonxona, zamonaviy savdo markazi, restoran va kafelar, tog‘ dor yo‘li singari inshootlarni barpo etish ko‘zda tutilgan.

Taqdimot chog‘ida hudud tabiiy sharoitlaridan foydalangan holda ekologik turizmni yuqori darajada rivojlantirishga yo‘naltirilgan sayyohlik majmuasi loyihasiga bir qator qo‘shimchalar kiritish taklifi bildirildi. Keyingi bosqichda loyihadan o‘rin olgan bino va inshootlar qurilishi investorlarga taqdim etiladi.