Viloyat hokimlarida mahalliylashtirish va import nazorati bo‘yicha yordamchi paydo bo‘ladi - Prezident

12 avgust kuni O‘zbekiston Respublikasi Prezidenti Shavkat Mirziyoyev raisligida iqtisodiyot tarmoqlari va hududlarning eksport salohiyatini oshirish, ulardan samarali foydalanish, investitsiyalarni, avvalo, to‘g‘ridan-to‘g‘ri xorijiy investitsiyalarni jalb qilish va o‘zlashtirish, ishlab chiqarishni mahalliylashtirish ko‘lamini kengaytirish masalalariga bag‘ishlangan videoselektor yig‘ilishi o‘tkazildi. Unda prezident ko‘plab masalalarga to‘xtaldi.

Davlat rahbarining ta'kidlashicha, endi viloyat hokimlarida mahalliylashtirish va import nazorati bo‘yicha yangi yordamchi paydo bo‘ladi. Ular viloyatdagi importni nazorat qiladi va mahalliylashtirish bilan shug‘ullanadi.

«Viloyat hokimlarida yangi yordamchi paydo bo‘ladi. U mahalliylashtirish va import nazorati bilan shug‘ullanadi. Biz importni kamaytirmas ekanmiz, iqtisodni rivojlantira olmaymiz. U viloyatga qanday mahsulotlar kirayotganini tekshiradi va shunga qarab reja ishlab chiqadi. Men kadrlar bo‘limiga tayinlayman, bu lavozimga iqtisodni tushunadigan aqlli odamlarni tavsiya qiladi», — deb prezidentning so‘zlarini keltirmoqda Kun.uz muxbiri.