Senat raisi Tanzila Norboyeva bugun, 22 avgust kuni, Senat binosida OAV xodimlari bilan uchrashuv o‘tkazdi. Fuqarolik jamiyatini mustahkamlashda Senatning o‘rni qanday bo‘lishi, xalqni rozi qilish, yuqori turuvchi organlar qay tartibda ishlashi kerakligi haqida fikrlar muhokama markazida bo‘ldi.
«Hammamizga ma'lumki, Prezident lavozimiga kirishganidan keyin xalq bilan muloqotni boshladi. O‘sha paytda Kasaba uyushmalari federatsiyasi rahbari bo‘lib ishlardim. Har kuni xalq bilan doimiy va uzluksiz aloqa qilishni avvaliga hamma rahbarlar ham to‘liq anglab yetishmadi. Ayniqsa, vazirlar tushunmadi. Ko‘pchilik o‘yladiki, bu odatiy hol, kampaniya sifatida o‘tadi-ketadi. Saylovgacha o‘tkaziladigan balandparvoz gaplar, deya talqin qilindi.
Lekin davlat rahbari bu yo‘nalishni bitta tizimga soldi. Yaqinda majlislardan birida ham prezident xalq bilan muloqot qilish yanayam kuchayishini, xalqdan fikr olib, davlat ahamiyatiga molik muhim qarorlar qabul qilinishini ta'kidladi. Biz, parlament a'zolari, deputatlar xalqning ichiga birinchi bo‘lib kirib borishimiz kerak. Hali bunday talabga javob berayotgan ish qilinayotgani yo‘q», deya fikr bildirdi Norboyeva.
Senat raisi aholi murojaatini tezkorlik bilan ko‘rib chiqishda yangi tizim yo‘lga qo‘yilganini aytib o‘tdi. Endilikda har bir senator ma'lum bir viloyatga xizmat safariga borishdan oldin o‘sha hududdan kelgan murojaat xatlarini o‘zi bilan olib ketadi, murojaatlar mazmunini o‘rganadi. So‘ng tegishli mutasaddilarni yig‘ib, muammoni joyida hal qilish tizimiga o‘tishadi.
Tadbirda jurnalist va blogerlar senatorlar faoliyati ochiqligini ta'minlash uchun bir nechta takliflar berishdi. Jumladan, har bir senatorning ijtimoiy tarmoqlarda sahifasi bo‘lishi lozim. Murojaatlar to‘g‘ridan-to‘g‘ri shu yerga jo‘natilsa, jarayonni tezlashtirish imkoni ortadi.
