OAV va blogerlarni qo‘llab-quvvatlash maqsadida tashkil etilgan Milliy mass-mediani qo‘llab-quvvatlash va rivojlantirish jamoat fondining Vasiylik kengashi raisi Komil Allamjonov fondning taqdimot marosimida nutq so‘zladi. U dastlab o‘zining avvalgi ish joyi - Axborot va ommaviy kommunikatsiyalar agentligi (AOKA)dagi faoliyati to‘g‘risida gapirib, tizim o‘zidan keyingi rahbarlar tomonidan to‘g‘ri va sifatli davom ettirilishiga umid bildirdi.
«Bugungi anjumanimizda sizlar bilan men odatiy davlat idorasi rahbari sifatida emas, balki endilikda jamoat tashkiloti vakili sifatida uchrashib turganimdan bag‘oyatda xursandman.
Men o‘z hayotimga nazar tashlasam, uning asosiy qismi bevosita matbuot, jurnalistika va media sohasi bilan bog‘langan. Taqdir menga bu sohaning eng quyi bo‘g‘inidan eng yuqori darajasigacha faoliyat yuritish imkonini berdi va tabiiyki, menda bugun so‘z erkinligi va matbuot sohasiga nisbatan o‘z qarashlarim, o‘z fikrim va takliflarim bor.
Yillar davomida taqdir meni matbuot va matbuot bilan bog‘liq turli sohalarda sinovdan o‘tkazdi. O‘zbekiston milliy teleradiokompaniyasining «Davr» informatsion dasturining rejissyor yordamchiligidan boshlab, to ko‘rsatuv va loyihalar muallifigacha, shu bilan birga turli vazirlik va idoralarning matbuot xizmatlarida oddiy xodimlikdan to rahbarlikkacha bo‘lgan lavozimlarda ishlashga to‘g‘ri keldi.
Davlat idoralaridan ketgan paytimda ham boshqa sohalar bilan bir qatorda media sohasiga tegishli turli loyihalarga rahbarlik qildim. Undan keyingi bosqich, ya'ni Prezident matbuot kotibligidan to bugungi kungacha bo‘lgan faoliyatimdan ushbu zalda o‘tirgan juda ko‘pchilikning yaxshi xabari bor.
O‘tgan davr mobaynida men jurnalistika sohasining barcha qirralarini yaxshi o‘rgandim. Jurnalistlar faoliyatiga yo‘l ochishi mumkin bo‘lgan yoki bo‘lmasa to‘g‘anoq bo‘layotgan barcha holatlarni o‘z ko‘zim bilan ko‘rdim. So‘z erkinligini ta'minlash retsepti nimalardan iboratligini faoliyatim davomida yaxshi tushunib yetdim, deya olaman.
Bugun matbuot duch kelayotgan turli muammolar, bosimlar yoki tahdidlarga guvoh bo‘lmoqdaman. Shu bilan birga, davlat idorasi rahbari sifatida qirg‘oqning narigi tomonidagi vaziyatni ham yaxshi o‘rgandim.
Shunga amin bo‘ldimki, jurnalist yoki blogerlar o‘z vaqtida va sifatli ma'lumot ololmasdan qiynalsa, davlat organi rahbarlari ortiqcha gapirib qo‘yishdan qo‘rqqan yoki matbuotga nisbatan sovuqqonlik bilan faoliyat yuritib kelgan.
