Norboyeva: Senat Quyi palata bilan birgalikda qat'iy parlament nazoratini o‘rnatadi

O‘zbekistonda fuqarolik jamiyati institutlari faoliyatiga doir kodeks ishlab chiqiladi. Bunda, o‘zbek xalqi va xalqaro tashkilotlarning fikr va takliflari, tavsiyalari inobatga olinadi, deb Senat raisi so‘zlaridan iqtibos keltirmoqda Kun.uz muxbiri. 

«Endilikda, fuqarolik jamiyati institutlari yuksaklikda bo‘ladi. Biz har doim ularning fikrlarini inobatga olamiz, deya olaman. Men bu gaplarni davlat rahbari nomidan aytayapman, desam ham bo‘ladi. Chunki, u o‘z murojaatida shunday fikrni bildirdi. Prezident Jamoatchilik palatasi tashkil etilishini va har bir inson ovozi tinglanishini, davlat xalq manfaatlariga xizmat qilishini aytgan edi. Shu boisdan ham davlat rahbaridan tortib barcha darajadagi rahbarlar joylarga chiqib, fuqarolar bilan uchrashmoqda, ularning muammolarini o‘rganmoqda. 

Aytmoqchi bo‘lganim, farmon va qarorlar, yo‘l xaritalari fuqarolar murojaatlaridan kelib chiqqan holda qabul qilinmoqda. Men Senatning yangi raisi sifatida va'da bera olaman, Senat parlament Quyi palatasi bilan hamkorlikda qat'iy parlament nazoratini o‘rnatadi, maxsus komissiya tuziladi, hokimliklar va boshqa idoralar mehnatga oid qonun talablariga rioya qilinishi bo‘yicha parlamentga hisobot beradi. 

Bundan tashqari, nodavlat notijorat tashkilotlari bo‘yicha fuqarolik jamiyati institutlarining kodeksi ishlab chiqiladi. Men shu masalada bir qancha elchilar bilan suhbatlashdim. Ular, bu kodeksda ayrim xalqaro me'yorlar inobatga olinmagani, ba'zi bir holatlar kiritilmagani yuzasidan o‘z xavotirlarini bildirishdi. 

Shuni ayta olamanki, bu kodeksning loyiha namunasidir. U, albatta, barcha xalqaro tashkilotlar, elchixonalarga yuboriladi. Faqatgina ularning tavsiyalari olingandan keyingina ushbu kodeks umumxalq muhokamasiga qo‘yiladi. Ya'ni, xalq bilan kelishmasdan, xalqaro tashkilotlar fikrlarini inobatga olmasdan bu kodeks qabul qilinmaydi», - dedi Tanzila Norboyeva.