16:13 / 28.02.2020
0
6923
Туркия Европага қочқинлар оқимини бошқа ушлаб турмасликка қарор қилди - ОАВ

Туркия Суриянинг Идлиб вилоятига берилган авиазарба оқибатида турк ҳарбийлари ҳалок бўлгандан кейин Европага суриялик мигрантлар оқимини бошқа ушлаб турмасликка қарор қилди. 

Фото: Reuters

Бу ҳақда Туркия ҳукуматидаги юқори лавозимли амалдорга таянган ҳолда Reuters ахборот агентлиги хабар берди.  

Маълум қилинишича, ушбу қарор Идлибдаги ҳужумдан кейин 27 февраль кечки пайт Туркия президенти Ражаб Тоййиб Эрдўған бошчилигида ўтган тезкор йиғилишда қабул қилинган.

Манбанинг маълум қилишича, Идлибда вазият кескинлашгандан кейин қочқинлар оқими кўпайиши мумкинлиги ортида турк полицияси, соҳилбўйи қўриқлаш хизмати ва чегара хизмати суриялик муҳожирларни қуруқликдаги ва денгиздаги чегара пунктларида ушлаб қолмасликка кўрсатма олган.  

Таъкидланишича, ушбу хабарлардан кейин Сурия, Покистон, Эрон ва Ироқдан бўлган қочқинлар Туркиянинг Европа билан чегаралари томон ҳаракатлана бошлашган. 

Ўз навбатида Европа Иттифоқи матбуот котиби Питер Станонинг маълум қилишича, Европа Иттифоқи Туркиядан миграция сиёсатини ўзгартиргани ҳақида огоҳлантириш олмаган. 

Суриялик қочқинлар айни вақтда турли давлатларда кун кечиришмоқда, улардан энг кўпи Сурия билан қўшни Ливан, Туркия, Иорданияда жойлашган. Туркиянинг ўзида 3,6 млн қочқин қолмоқда. 

Европа Иттифоқи давлатлари раҳбарлари 2016 йил мартида Туркия билан миграция инқирозига қарши курашиш бўйича биргаликдаги режани келишиб олишган. Режа Анқарага қочқинларни қабул қилиши учун молиявий ёрдам қўрсатилишини, Грецияга Туркиядан келувчи барча ноқонуний мигрантларни яна Туркияга қайтаришни ва Европа Иттифоқи томонидан Туркиядаги суриялик қочқинларнинг “бир қочқинга бир қочқин” принципи бўйича қабул қилинишини кўзда тутади.   

Мавзу
Идлиб можароси
2019 йил декабрида Сурия армияси Идлибни тўлиқ эгаллаш учун юриш бошлади. Туркия эса Сурия шимолидаги иттифоқчиларини ҳимоя қилиш учун бу ҳудуддаги кузатув постларига минглаб ҳарбийларини жўнатди ва икки томон ўртасида тўқнашувлар рўй бера бошлади.
Барчаси
Ушбу хабарга фикрингизни билдиринг. Бунинг учун авторизациядан ўтишингиз керак!
Top