17:05 / 19.04.2020
5096
Ҳарбий-ватанпарварлик йўналишига ихтисослаштирилган синфларга қабул тартиби белгиланди

17 апрель куни "Умумий ўрта таълим ва ихтисослаштирилган мактабларда ҳарбий-ватанпарварлик йўналишига ихтисослаштирилган синфлар фаолиятини ташкил этиш чора-тадбирлари тўғрисида"ги ҳукумат қарори қабул қилинди.

Фото: KUN.UZ

Қарор билан Умумий ўрта таълим ва ихтисослаштирилган мактабларнинг ҳарбий-ватанпарварлик йўналишига ихтисослаштирилган синфлари тўғрисидаги низом тасдиқланди. Бу ҳақда Адлия вазирлиги маълум қилди.

Низомга мувофиқ, ихтисослаштирилган синфлардан мақсад – умумий ўрта таълим фанлари доирасида ҳарбий-ватанпарварлик йўналиши бўйича ўқувчиларнинг чуқур таълим олишини таъминлашдир.

Бу синфларга мактабларнинг 6-синфини муваффақиятли якунлаган, чуқурлаштирилган фанлардан қобилиятини кўрсата олган ўғил ва қизлар танлов асосида қабул қилинади.

  • Номзодлардан тегишли ҳужжатлар 1-20 июль кунлари қабул қилинади.
  • Жисмоний тайёргарлик синовлари 21 июль – 5 август, тегишли фанлар бўйича тест синовлари 15-25 август кунлари оралиғида ўтказилади.
  • Жисмоний тайёргарлик синовлари якунлари бўйича 100 баллик тизимда 70 ва ундан юқори балл тўплаган номзодлар тест синовларига қўйилади. 

Мактабларнинг ихтисослаштирилган синфларида ўқиш муддати 5 йилдан (7-11 синфлар) иборат бўлади.

2020/2021 ўқув йилидан бошлаб ихтисослаштирилган синфларга 6-синфни битирган 30 нафар ўқувчи қабул қилинади.

Маълумот учун, республикадаги 56та мактабда ҳарбий-ватанпарварлик йўналишига ихтисослаштирилган синфлар фаолият юритмоқда. Бу синфлар 2017 йил 17 ноябрда қабул қилинган президент қарорига асосан ташкил этилган.

Top