Turkiyada koronavirusga chalingan 107 yoshli ayol sog‘aygani xabar qilindi

Istanbullik 107 yoshli Havoxon Karadeniz koronavirusga chalingandi va bu kasallikdan forig‘ bo‘ldi, deb xabar bermoqda Anadolu agentligi.

Onaxon 7 aprel kuni yo‘tal va yuqori harorat bilan Istanbuldagi ilmiy-tadqiqot klinikasiga keltirilgan. Tibbiy tekshiruv natijasida unda koronavirus aniqlangan.

Agentlikning ma'lumot berishicha, ayol bir hafta ichida sog‘ayib ketgan. Shifokorlar u kuchli immuniteti tufayli shunday qisqa muddat ichida sog‘ayishga muvaffaq bo‘ldi deb hisoblashmoqda. 

Onaxon hozirda uyida 14 kunlik karantinni o‘tamoqda. Uning nabirasi Ender Chirag ham uyida karantinda.

Turkiyada koronavirus yuqtirish bilan bog‘liq birinchi holat 11 martda qayd etilgandi. Oxirgi ma'lumotlarga ko‘ra, mamlakatda koronavirusga chalinganlar soni 82 ming kishidan oshgan.