«G‘alaba bog‘i majmuasi» faoliyati tashkil etiladi

Vazirlar Mahkamasining “G‘alaba bog‘i majmuasi faoliyatini tashkil etish chora-tadbirlari to‘g‘risida”gi qarori loyihasi muhokama uchun joylashtirildi.

O‘zbekiston Respublikasi Mudofaa vazirligi, Madaniyat vazirligi va Toshkent shahar hokimligining:

Toshkent shahri Olmazor tumanida barpo etilgan Ikkinchi jahon urushi davriga oid G‘alaba bog‘i va uning kirish qismi, bog‘ tarkibidagi Markaziy xiyobon, Temir yo‘l vokzali, harbiy texnikalar maydonchalari, Amfiteatr va ma'muriy bino, G‘alaba hududi, Urushning dahshatli qiyofasi, Front orti hududi, Motam va anduh hududi, Shodu-xurramlik hududi, Shukronalik hududi, G‘alaba hududi, Shon-sharaf davlat muzeyi hamda monument va haykallardan iborat yuridik shaxs maqomiga ega bo‘lgan davlat muassasasi shaklidagi “G‘alaba bog‘i majmuasi” faoliyatini tashkil etish;

Majmuani operativ boshqaruv huquqi asosida O‘zbekiston Respublikasi Mudofaa vazirligi tasarrufiga berish;

Majmua hududida O‘zbekiston Respublikasi Mudofaa vazirligi Ma'naviyat va ma'rifat markazini bepul foydalanish huquqi bilan joylashtirish to‘g‘risidagi takliflariga rozilik beriladi.

Quyidagilar Majmuaning asosiy vazifalari etib belgilanadi:

Ikkinchi jahon urushi maydonlari va front ortida mardlik, jasorat va matonat ko‘rsatgan O‘zbekiston xalqiga yuksak hurmat hamda ehtirom ko‘rsatish, Ikkinchi jahon urushi qatnashchilari va front orti mehnatkashlari nomlarini abadiylashtirish, o‘zbek xalqining buyuk g‘alabaga qo‘shgan hissasini keng miqyosda yoritish;

aholining tarix bilan hamnafas bo‘lib, o‘tganlar xotirasini yod etishi, ularga hurmat bajo keltirishi, shuningdek, mazmunli dam olishi bilan bog‘liq ma'naviy-ma'rifiy tadbirlarni hamda respublika va xalqaro miqyosda ilmiy-amaliy anjumanlar, konferensiyalar, seminarlar, mahorat darslari, ijodiy kechalar, ko‘rgazmalar va boshqa tadbirlarni tashkil etish va o‘tkazish;

turistlar, ilmiy tadqiqotchilar va tashrif buyuruvchilar uchun qulay shart-sharoitlar yaratish, Majmuada zamonaviy kompleks dam olish maskanlarini tashkil etish va uning turistik salohiyatini oshirish yuzasidan zarur chora-tadbirlarni amalga oshirish;

yoshlarni urushning dahshatli oqibatlarini hech qachon unutmaslikka chorlash, mustaqillik, tinch va osuda hayotning qadriga yetish, Vatan himoyasiga doimo tayyor turish ruhida tarbiyalash ishlarida qatnashish;

mustaqil ravishda va O‘zbekiston Respublikasi Qurolli Kuchlari davlat muzeyi bilan hamkorlikda Ikkinchi jahon urushi davriga oid ekspozitsiyalarni tadqiq etish bo‘yicha ilmiy-tadqiqotlar o‘tkazish;

respublika ta'lim muassasalari bilan hamkorlikda Majmuada ochiq darslar, ma'ruza va seminar mashg‘ulotlari, talabalarning malakaviy amaliyot o‘tashini tashkillashtirish;

Majmua hududida joylashgan bino, inshoot va boshqa obektlardan maqsadga muvofiq foydalanish va ularning belgilangan tartibda saqlanishini ta'minlash;

Majmua tarkibiga kiruvchi Shon-sharaf davlat muzeyi fondlari va ekspozitsiyalarini Ikkinchi jahon urushi hamda mehnat fronti qatnashchilari va qahramonlariga oid arxiv hujjatlari hamda ularning mardligi va yuksak jasoratini haqqoniy yoritishga qaratilgan mamlakatimiz va xorijdagi Ikkinchi jahon urushi bilan bog‘liq hujjatlar va boshqa eksponatlar bilan muntazam boyitib borish;

Ikkinchi jahon urushida qozonilgan g‘alabada O‘zbekiston xalqining qo‘shgan ulkan hissani aniq tarixiy hujjatlar bilan asoslash uchun fundamental va ilmiy-amaliy tadqiqotlar olib borish hamda ularni keng jamoatchilikka taqdim etish;

O‘zbekistonning harbiy tarixini o‘rganish, jumladan, o‘zbek davlatchiligi tarixida muhim o‘rin tutgan buyuk sarkardalar, davlat arboblarining qo‘lga kiritgan yutuqlari, ularning jahon harbiy san'atida tutgan o‘rnini ilmiy tadqiq qilish va targ‘ib qilish;

Ikkinchi jahon urushiga oid muzey ashyolari va kolleksiyalarini saqlash, aniqlash, to‘plash, o‘rganish va ularni keng ommaga namoyish qilish, shuningdek, madaniy, ma'rifiy va ilmiy faoliyatni amalga oshirish;

Majmua tarkibiga kiruvchi Shon-sharaf davlat muzeyi ekspozitsiyasini takomillashtirishda zamonaviy axborot texnologiyalaridan keng foydalanish, noan'anaviy ekspozitsiyalar yaratish bo‘yicha xalqaro hamkorlikni yo‘lga qo‘yish, chet el muzeylari bilan ko‘rgazmalar tashkil etish borasida o‘zaro manfaatli hamkorlik aloqalarini o‘rnatish;

Ikkinchi jahon urushi va mehnat fronti qatnashchilari hamda faxriylarining hayoti va faoliyatini o‘rganish, ularning ko‘rsatgan xizmatlari va qahramonligi haqidagi ma'lumotlarni to‘plash, nashrga tayyorlash va chop etish;

Ikkinchi jahon urushi davriga oid tegishli kolleksiyalar va ashyolarni saqlash, hisobga olish, eksponatga qo‘yish;

Majmua tarkibiga kiruvchi Shon-sharaf davlat muzeyi kolleksiyalari va ashyolariga oid ma'lumotlar bazasini shakllantirish, yuritish, ularni yangilab borish, hamda muzeyning butun fondi reyestri va yo‘l ko‘rsatkichini kataloglashtirish ishlarini tashkil etish, shuningdek muzey kolleksiyalari va ashyolarini bosma hamda elektron variantda O‘zbekiston Respublikasi Milliy muzey fondiga kiritish yuzasidan takliflar kiritish;

aholiga madaniy-dam olish xizmatlari ko‘rsatish.