Italiyada bir millionga yaqin ish o‘rni yo‘qolib ketish xavfi ostida turibdi

Italiyada koronavirus pandemiyasining iqtisodiy oqibatlari natijasida 1 millionga yaqin ish o‘rni qisqarish xavfi ostida turibdi. Bu haqda Italiya sanoati umumiy konfederatsiyasi (Confindustria) prezidenti  Karlo Bonomi ma'lum qildi.

"May oyi yakuni bo‘yicha ma'lumotlarni kutyapmiz, ammo gap xavf ostida turgan 700 mingdan 1 milliongacha ish o‘rni haqida bormoqda", - dedi u.

Bonomi Italiya hukumatini keskin tanqid qildi.

"Men favqulodda vaziyatga e'tibor qaratgan siyosiy sinfni ko‘rib turibman va bu to‘g‘ri. Ammo u bizning qayerga qarab ketishimiz borasida strategiyaga mutlaqo ega emas va bu qattiq xavotirga solmoqda", - dedi Confindustria prezident. 

Avvalroq Italiya hukumati koronavirus epidemiyasidan jabr ko‘rgan biznes va aholiga yordam berishga qaratilgan 55 mlrd yevrolik rag‘batlantiruvchi choralar paketini ma'qullagandi.

Xususan, yuqoridagi summadan 25,6 mlrd yevro vaqtinchalik ishsiz qolgan ishchilarga nafaqalar va o‘zini ish bilan ta'minlarga bonuslar to‘lashga sarflanadi. Kompaniyalarni qo‘llab-quvvatlashga 15-16 mln yevro sarflanadi. Yana 3,25 mlrd yevro sog‘liqni saqlash tizimiga mo‘ljallangan. 

Italiyada 2 oylik karantindan keyin biznes va harakatlanishga cheklovlar sekin-asta bekor qilinmoqda.