Kolumbiyada YTHga uchragan benzovozdan benzin quyib olayotganlar yong‘in ichida qoldi 

El Tiempo nashrining xabar berishicha, benzovoz trassadan chiqib ketib, ag‘darilib ketgan. Mahalliy aholi vaziyatdan foydalanishga urinib, benzovozdagi yonilg‘ini idishlarga quyib olishga tushib ketgan. Voqea joyiga kelgan politsiyachilar ularga qarshilik ko‘rsatmagan.

Lahzalardan birida portlash sodir bo‘lgan va mashina oldida to‘planib turgan odamlar o‘t ichida qolgan. Voqea oqibatida kamida 10 kishi halok bo‘lgan, yana bir necha kishi jarohat olgan. Ta'kidlanishicha, jabrlanganlardan bir qismi og‘ir ahvolda. 

Shunga o‘xshash voqea 2019 yilda Tanzaniyada yuz bergan. O‘shanda yonilg‘i sisternasining portlashi 57 kishining o‘limiga olib kelgan.