Reytingga koʻra, Kolumbiyada yiliga oʻrtacha 3240 millimetr yogʻingarchilik kuzatiladi. Shu bilan birga, mamlakat iqlimi bir xil emas: uning ayrim hududlarida quruq savannalar boʻlsa, boshqa joylarida nam tropik oʻrmonlar mavjud.
Ikkinchi oʻrinni Afrikaning orol davlati San-Tome va Prinsipi egallagan. Bu mamlakatda yiliga oʻrtacha 3200 millimetr yogʻin tushadi. Yomgʻirli mavsum esa taxminan toʻqqiz oy davom etadi.
San-Tome va Prinsipi eng seryogʻin oʻntalikka kirgan yagona Afrika mamlakati hisoblanadi.
Uchinchi oʻrinda Papua - Yangi Gvineya qayd etilgan. Bu mamlakatda yillik oʻrtacha yogʻingarchilik miqdori 3142 millimetrni tashkil etadi.
Eng seryogʻin mamlakatlarning aksariyati bir nechta geografik mintaqada joylashgan. Jumladan, Indoneziya, Bruney va Malayziya Janubi-Sharqiy Osiyoning dengiz hududlarida joylashgan.
Janubiy Tinch okeani mintaqasidan Samoa, Solomon orollari va Papua - Yangi Gvineya reytingga kirgan. Markaziy Amerikadan esa qoʻshni Kosta-Rika va Panama eng seryogʻin mamlakatlar qatorida qayd etilgan.
Qizigʻi, Hindistondagi Mausinram Yer yuzidagi eng seryogʻin joylardan biri hisoblansa-da, Hindiston mazkur reytingning yuqori pogʻonalaridan joy olmagan. Sababi reyting alohida shahar yoki hududdagi emas, balki butun mamlakat boʻyicha oʻrtacha yogʻingarchilik miqdoriga asoslangan.
