Agroinspeksiya Asaka tuman bo‘limi boshlig‘i fermerdan tamagirlik bilan 10 ming AQSh dollari pora olgan vaqtida ushlangan. Bu haqda Iqtisodiy jinoyatlarga qarshi kurash departamenti ma'lum qildi.
«Narxlarni manipulyatsiya qilish, oziq-ovqat xavfsizligini ta'minlash tizimiga putur yetkazuvchi jinoyatlarga qarshi kurash olib borilmoqda. O‘tkazilgan tadbirlarda qariyb 6 milliard so‘mlik oziq-ovqat mahsulotlari qimmat sotilishining oldi olindi.
Qishloq xo‘jaligi yerlarini korrupsion jinoyatlar orqali sotish, zaxira uchun ajratilgan mablag‘larni talon-toroj qilish va boshqa holatlar bilan bog‘liq 87ta jinoyat fosh etildi», dedi departament rasmiysi.
Farhod Ochilovning ta'kidlashicha, shunday jinoyatlardan biri Asaka tumanida sodir bo‘lgan.
Ma'lum qilinishicha, pandemiya davrida Agroinspeksiya Asaka tuman bo‘limi boshlig‘i tumandagi fermer xo‘jaligiga tegishli 44 gektar yerda qishloq xo‘jaligi mahsulotlari to‘liq ekilmaganini ro‘kach qilib, yer maydonini boshqaga olib berish bilan qo‘rqitib, xo‘jalik rahbaridan tamagirlik bilan 10 ming AQSh dollari pora olgan vaqtida ushlangan.
«Shuningdek, dehqonlarning mulkiga ko‘z olaytirayotganlar bilan bog‘liq holatlar ham o‘rganilmoqda. Masalan, ikki nafar tomorqa yer egasiga Marhamat tuman «Dexqon bozor» MChJ hududida qishloq xo‘jalik mahsulotlari bilan savdo qilishi uchun rasta ajratib berishi evaziga 2 million so‘mni olishga uringan shaxs ashyoviy dalillar bilan qo‘lga olindi. Unga nisbatan jinoyat ishi qo‘zg‘atilib, hozirda tergov harakatlari olib borilmoqda», deya misol keltirdi Farhod Ochilov.
