“Tibbiy jihatdan tayyor maktablar ochiladi”. Maktablarning ochilish tartibi va o‘quv jarayonlari haqida batafsil ma'lumot berildi

Usmon Sharifxo‘jayevga ko‘ra, maktab darslarini an'anaviy yoki televizion ko‘rinishda tashkillashtirish yuzasidan o‘tkazilgan so‘rovnomada 5,5 million ota-ona qatnashgan bo‘lsa, shundan 76 foizi an'anaviy dars shaklini ma'qullagan. Qolgan 24 foizi esa farzandini maktabga yuborishga xayrixoh emasligini bildirgan.

“Har bir ota-onaning tanlovi hurmat qilinishi kerak. Shuning uchun ayni damda ota-ona an'anaviy shakldagi ta'limdan qo‘rqayotgan bo‘lsa, ularni farzandini maktabga yuborishga majbur qilish kerak emas”, dedi vazir o‘rinbosari.

Televizion dars afzalliklari

Televizorda beriladigan darslar 3ta kanal orqali, maktab darslari bilan parallel tarzda uzatib boriladi. Televizorda uzatiladigan darslarning bir qancha afzal tomonlari bor. Birinchidan, maktabdagi darslarga qatnab yurgan o‘quvchi virus yuqtirib olsa, darslarni to‘xtatmasdan televizordan eshitib olish imkoni bo‘ladi. Agar o‘qituvchisi kasal bo‘lib qolsa ham an'anaviy ta'limda o‘qib yurgan bola darsni televizordan tomosha qilishi mumkin bo‘ladi. Yana bir yaxshi tomoni, o‘quvchi maktabda o‘tilgan darsni qayta ko‘rib, takrorlashiga imkoniyat bo‘ladi.

Maktablardagi umimiy karantin qoidalari qanday?

Har bir hudud o‘z maktablarini tayyorlashi shart. Mahalliy hokimiyat va Xalq ta'limi bo‘limlari yordami bilan maktablar termometr va boshqa kerakli tibbiy vositalar bilan ta'minlanishi ko‘zda tutilgan. Shuningdek, maktablarda Sanitariya-epidemiologiya xizmati tomonidan treninglar o‘tqaziladi, maktab xodimlari, o‘qituvchilarga karantin qoidalari batafsil tushuntiriladi.

Sog‘liqni saqlash vazirligi tomonidan har bir maktabga bittadan hamshira biriktiriladi. Hamshira kun davomida maktabda faoliyat olib boradi. O‘quvchilarning kelib ketishi Ichki ishlar va Milliy gvardiya xodimlari tomonidan nazoratga olinadi.  

Yuqoridagi talablar bo‘yicha, Sanitariya-epidemiologiya xizmati maktabni tibbiy jihatdan to‘liq tayyor deb topsa, mahalliy hokimiyat va Xalq ta'limi bo‘limlari tuman xalq deputatlari kengashlariga maktabni ochish bo‘yicha taklif kiritadi. Kengash qaroriga ko‘ra, tibbiy jihatdan tayyor maktablar ochiladi.

Maktablar 14 sentyabrdan ochilishi ko‘zda tutilgan, 7-14 sentabr oralig‘ida maktablar tayyor holga kelishi kerak. O‘qishning birinchi haftasi kirish haftasi bo‘lib, karantin davrida o‘tilmay qolgan darslar takrorlanadi. Shu bilan birga, birinchi haftadan o‘quvchilarni maktabdagi karantin qoidalari bilan tanishtirish maqsad qilingan.

Dars davomidagi tanaffuslar vaqti, o‘quvchilarning maktabga kelib-ketish soatlarida ham o‘zgarishlar bo‘ladi. Hamma bola birdaniga maktabga kelolmaydi, bu kun davomida grafik asosida rejalashtiriladi. Xorijiy tajriba o‘rganilib, har bir maktab o‘zi uchun tanaffus vaqtlarini belgilashi ham rejalashtirilyapti. Shuningdek, masofadan o‘qigan o‘quvchilarning kunlik monitoringi qilinadi.

Maktabdagi karantin qoidalarini kim nazorat qiladi?

Yangi o‘quv yilida jamoat nazoratini kuchaytirish juda muhim hisoblanadi. Avvalo ota-ona maktab sharoitidan qoniqmasa, maktab direktoriga murojaat qilishi yoki farzandini maktabga yubormasligi ham mumkin. Maktabni to‘liq tayyorlash sektor boshliqlari va hokimiyat zimmasida. Niqoblarni hamma o‘zi olishi kerak bo‘ladi. Faqatgina kam ta'minlangan oila farzandlari uchun hokimiyat doka niqoblar tayyorlashni rejalashtiryapti. Hudud hokimlari suv bormagan joylarni suv bilan ta'minlash bo‘yicha rejalar qilyapti.

Qaysi holatda sinf yoki maktablar yopilishi mumkin?

Qaysi maktabda o‘rtacha 10 foiz - 3ta bolada virus aniqlansa, shu sinf karantinga olinib yopiladi. Agar maktabdagi o‘quvchilarning 10 foizi kasal bo‘lsa, maktab ham yopilishi mukin. Bolalar vaqtinchalik uyda o‘qiydi. Tuman kengashlariga vaziyatga qarab ish tutish vakolati berilgan.