Turdimov Samarqandning uchta qoloq tumanini sanadi

«Bugun mamlakatda davlat idoralari va hududlarning rahbarlariga hududning ijtimoiy-iqtisodiy ko‘rsatkichlariga qarab baho berish tizimi yaratildi. Reyting baholash tizimi orqali endi hududlar «qizil», «sariq» va «yashil» toifalarga ajratilayotgani har bir rahbarni o‘z faoliyatini tahlil qilishga undaydi.

O‘tkazilgan tahlillarga ko‘ra, Samarqand va Kattaqo‘rg‘on shaharlari, Bulung‘ur hamda Samarqand tumanlari «yashil» hududga kiritilgan. Qo‘shrabot, Paxtachi va Payariq tumanlari qoloq, ya'ni «qizil» hududlar tasnifiga kiritilgan va bu achinarli holat», dedi Erkinjon Turdimov.

Turdimov ichimlik suvi va oqova suv ta'minotini yaxshilash haqida ham gapirdi: «Bugungi kunda viloyat aholisining 66,8 foizi toza ichimlik suvi bilan ta'minlangan. Viloyatda 4 841 km ichimlik suvi tarmog‘i mavjud bo‘lib, shundan 1 123,4 km (23,2 foizi) ta'mirtalab holatda. Mavjud 1 872 ta suv quduqlaridan 675 tasi (36 foizi), mavjud 1 671 ta suv inshootlarining 551 tasi (32,9 foizi), 89 ta rezervuarlardan 19 tasi (21,3 foizi) ta'mirtalab ahvolda», dedi viloyat hokimi.

Turdimovning aytishicha, pandemiyaga qaramay, viloyatda 735 km suv quvurlari, 6 ta rezervuar va 143 ta suv inshootlari 580,3 milliard so‘mga rekonstruksiya qilingan. Bu o‘tgan yilgiga qaraganda 2,7 baravar ko‘p degani.

Hokim o‘z murojaatida Moliya vazirligi huzurida 10 trillion so‘mdan iborat Inqirozga qarshi kurashish jamg‘armasidan viloyat uchun jami 637,4 milliard so‘m mablag‘ ajratilganini ma'lum qildi.

Samarqandda 19,5 ming nafar yakka tartibdagi tadbirkorlar, 37 mingta mikrofirma va kichik korxonalarga jami 272 milliard so‘mlik soliq imtiyozlari qo‘llangan. 265 ta xo‘jalik yurituvchi sub'yektlarning 7,8 milliard so‘m soliq to‘lovi muddati kechiktirilgan, 3 360 ta korxonaning 1,4 milliard so‘m soliq qarzi va penyasi hisobdan chiqarilgan. 1 540 ta kichik tadbirkorlik sub'yektlari 7,1 milliard so‘mlik mol-mulk va yer solig‘idan ozod etilgan.