Foto: O‘zbekistonlik ko‘ngillilar Xitoy vaksinasi klinik sinovlarida qatnashmoqda

O‘zbekiston Innovatsion rivojlanish vazirligi huzuridagi Ilg‘or texnologiyalar markazi hamda Sog‘liqni saqlash vazirligi Virusologiya ilmiy-tekshirish instituti tomonidan Xitoyning Anhui Zhifei Loncom Biofarmaceutical kompaniyasida ishlab chiqarilgan ZF2001 rekombinant vaksinasining III faza klinik sinovlari amalga oshirilmoqda.

Innovatsion rivojlanish vazirligi xabariga ko‘ra, sinovga 18 yoshdan katta, surunkali kasalliklarga chalinmagan 5000 nafar ko‘ngilli ishtirokchilarni jalb etish rejalashtirilgan bo‘lib, hozirda ko‘ngillilar ro‘yxatini shakllantirish bilan bir qatorda, tanlab olingan ko‘ngillilarga 1-doza vaksina bilan emlash ishlari olib borilmoqda. Ko‘ngillilar sinov jarayonida jami uch doza vaksina bilan emlanishi ko‘zda tutilgan.

Sinov vaksinasi bu – tadqiqot natijasida yaratilgan vaksina turi bo‘lib, klinik sinovlarda qo‘llash uchun mo‘ljallangan va tegishli tashkilotlardan tasdiqlanmaguncha, sotuvga chiqarilmaydi. Mazkur vaksina CHO hujayralarida ishlab chiqarilgan yangi koronavirusning retseptorga bog‘lanuvchi oqsilning (inglizcha qisqartma: NCP-RBD) rekombinant shaklini tozalab, alyuminiy gidroksidi qo‘shish orqali tayyorlangan. Ushbu tadqiqot vaksinasi har bir idishi 25mg/0.5ml/flakon shaklida bo‘lib, 25 mg yangi koronavirusning retseptorga bog‘lanuvchi oqsilning (NCP-RBD) rekombinant shakli va 0.25 mg alyuminiy gidroksididan iborat.

Ta'kidlanishicha, ushbu tadqiqotda ishtirok etish yoki etmaslik to‘laqonli ixtiyoriy. Sinov davri mobaynida ko‘ngillilar sinovni davom ettirishga majburlanmaydi. Ushbu sinovda ishtirok etishga qaror qilgan nomzod rozilik xatiga imzo chekishi va uning bir nusxasini o‘zida saqlashi so‘raladi. Sinovda qatnashishga qaror qilishdan avval, COVID-19’ga aloqador simptomlar yo‘qligi va COVID-19 infeksiyasi yuqtirib olinganiga shubha yo‘qligi tasdiqlanishi kerak. Shuningdek, nomzod COVID-19 vaksinalarining sinovida ishtirok etmagani va ishtirok etmasligini tasdiqlashi lozim.

«Tadqiqotda qatnashishga qaror qilgan nomzodning kasallik tarixi, salomatlik ko‘rsatkichlari, vaksinani qabul qilganidan so‘ng yig‘ilgan ma'lumotlar va shu kabi boshqa ma'lumotlar yozib olinadi. Shu bilan birga, nomzodlarga yangi koronavirus infeksiyasidan qanday saqlanish mumkinligi to‘g‘risida ko‘rsatmalar beriladi.

Ushbu sinov 14 oy davom etadi», deyiladi xabarda.