09:34 / 25.12.2020
3008
Токио баҳсли ороллар яқинидаги машғулотлар сабабли Сеулга норозилик билдирди  
Фото: Reuters

Япония ҳукумати Япон денгизидаги Такэсима (Токто) оролларида ҳарбий машғулотлар ўтказилиши сабабли Жанубий Кореяга норозилик билдирди. Ушбу оролларга Япония даъвогарлик қилади.

“Такэсима ороллари тарихан ва халқаро ҳуқуқ нуқтайи назаридан Япониянинг азалий ҳудуди ҳисобланади. Биз бундай ҳаракатларни номақбул деб ҳисоблаймиз ва шу сабабли Жанубий Кореяга норозилик билдирамиз”, деб айтган Япония ҳукумати бош котиби Кацунобу Като.   

25 декабрда Yonhap ахборот агентлиги машғулотлар Жанубий Корея ҳарбий-денгиз кучлари ва соҳилбўйи қўриқлаш кучлари иштирокида 4 декабрда ўтганини маълум қилган.   

Такэсима ороллари Токио ва Сеул ўртасидаги баҳс сабаби ҳисобланади. Япониянинг таъкидлашича, Жанубий Корея Япония империяси таркибига 1905 йилда киритилган бу ҳудудларни босиб олган. Ўз навбатида Жанубий Корея ва Шимолий Кореянинг таъкидлашича, ушбу ороллар азалдан корейс давлати таркибига кирган. Ҳозирда ороллар Жанубий Корея армияси томонидан назорат қилинади.       

Top