Rossiyada 60 yoshdan oshganlar uchun «Sputnik V» vaksinasidan foydalanish ma'qullandi

Rossiyada yoshi keksa insonlar uchun uchun «Sputnik V» vaksinasining xavfsiz ekani ekspertiza davomida tasdiqlandi. Bu haqda mamlakat sog‘liqni saqlash vaziri Mixail Murashko «Rossiya 24» telekanali efirida aytib o‘tdi. 

Mamlakat Sog‘liqni saqlash vazirligi ommaviy emlash paytida 60 yoshdan oshgan kishilar uchun preparatni qo‘llash haqida ijobiy xulosa berdi.

«Sputnik V» vaksinasini 60 yoshdan oshganlarda qo‘llash bo‘yicha klinik tadqiqotlar o‘tkazildi. Ekspertiza uning xavfsiz va samarador ekanini tasdiqladi. Sog‘liqni saqlash vazirligi tibbiy maqsadlarda foydalanish bo‘yicha yo‘riqnomaga tuzatishlar kiritishni ma'qulladi», - dedi vazir. 

Payshanba kuni vaksinani ishlab chiqqan Gamaleya nomidagi markaz direktori Aleksandr Ginsburg preparatni keksa yoshdagi fuqarolarda sinovdan o‘tkazish ishlari yakunlanganini xabar qildi. Uning so‘zlariga ko‘ra, 60 yoshdan oshgan fuqarolarni emlash to‘g‘risida qaror yaqin kunlarda qabul qilinishi mumkin. 

Bungacha u ushbu toifadagi fuqarolarni bevosita emlash jarayoni kelasi yil boshida boshlanishi mumkinligi haqida aytib o‘tgandi.

O‘tgan hafta mamlakat prezidenti Vladimir Putin koronavirusga qarshi emlanmagani, bunga uni fuqarolarning yosh toifasi bo‘yicha qo‘llash hali tasdiqlanmagani sabab ekanini ma'lum qilgandi. «Mutaxassislarning aytishicha, bugungi kunda muomalaga chiqarilayotgan vaksinalar ma'lum bir yoshdagi fuqarolarga mo‘ljallangan. Vaksinalar hali men kabilarga yetib kelmadi. Shu ma'noda men mutaxassislarning tavsiyalariga amal qilyapman», - dedi Putin. Shu bilan birga, u «imkoni boricha tezroq» emlanishini bildirdi. Rossiya prezidenti hozir 68 yoshda. 

Rossiyada keksa yoshli fuqarolarda «Sputnik V» vaksinasini sinovdan o‘tkazish oktyabr oyi o‘rtalarida boshlandi. Keyinchalik xuddi shu tadqiqot Novosibirskning «Vektor» markazi tomonidan ishlab chiqarilgan «EpiVakKorona» ikkinchi vaksinasi bo‘yicha o‘tkazildi.