Kimyo texnologiyalarini rivojlantirishga 53,8 mln dollar ajratiladi

Vazirlar Mahkamasining «Ilmiy-tadqiqot va loyihalash instituti – Kimyo texnologiyalari markazini tashkil etish» investitsiya loyihasini amalga oshirish chora-tadbirlari to‘g‘risida»gi qarori qabul qilindi. Bu haqda Norma xabar bermoqda.
 
2019 yil 6 dekabrda Moliya vazirligi, Investitsiyalar va tashqi savdo vazirligi, «O‘zkimyosanoat» AJ va Koreya Respublikasining Eksimbanki o‘rtasida Ilmiy-tadqiqot va loyihalash instituti – Kimyo texnologiyalari markazini tashkil etish investitsiya loyihasini birgalikda amalga oshirish va moliyalashtirish to‘g‘risidagi O‘zaro anglashuv memorandumi imzolangan.
 
Loyihani amalga oshirish uchun «O‘zkimyosanoat» AJ muassisligida «Toshkent kimyo-texnologiya ilmiy tadqiqot instituti» MChJ tashkil etildi.
 
2020 yil may oyida umumiy qiymati 53,8 mln AQSh dollariga teng bo‘lgan loyihaning texnik-iqtisodiy asosi tasdiqlandi va belgilangan tartibda vakolatli davlat organlarida ekspertizadan o‘tkazildi. Loyiha 2024 yil dekabrda ishga tushiriladi.
 
Quyidagilar loyihani moliyalashtirish manbalari etib belgilandi:

Koreya Respublikasi Eksimbanki tomonidan 40 yil muddatga, shu jumladan 10 yil imtiyozli davr bilan, yillik foiz stavkasi 0,15 foizni tashkil etuvchi 40 mln AQSh dollari miqdorida ajratiladigan kredit;

«O‘zkimyosanoat» AJ va uning tarkibidagi tashkilotlarning sof foydasidan Innovatsion faoliyatni qo‘llab-quvvatlash jamg‘armalariga ajratiladigan mablag‘larning 50 foizini yo‘naltirish hisobidan 13,8 mln AQSh dollari.
 
Qaror bilan loyihaning texnik-iqtisodiy parametrlari, loyiha bo‘yicha asosiy qarzni, unga hisoblangan foizlarni va boshqa to‘lovlarni qaytarish prognoz jadvali tasdiqlandi.
 
Belgilanishicha, Koreya Respublikasi Eksimbanki krediti bo‘yicha asosiy qarz, unga hisoblangan foizlar va boshqa to‘lovlar «O‘zkimyosanoat» AJ va uning tarkibidagi tashkilotlarning sof foydasi, Innovatsion faoliyatni qo‘llab-quvvatlash jamg‘armalari mablag‘lari hamda Toshkent kimyo-texnologiya ilmiy tadqiqot institutining innovatsiyalar va patentlarni sotishdan tushgan tushumlari hisobidan qoplanadi.