Prezident Shavkat Mirziyoyev Farg‘ona viloyatiga tashrifi davomida Rishton tumanida qurilgan Xalqaro kulolchilik markazini borib ko‘rgandi.
«Maxsus rakurs» ko‘rsatuvida xabar qilinishicha, prezident hunarmandlar bilan suhbatda endi kulolchilik buyumlarini asrab-avaylash haqida emas, balki Rishton kulolchiligini aholi orasida ommalashtirish kerakligi haqida o‘ylash lozimligini aytib o‘tgan. U endi nafaqat ko‘rgazmalar yoki muzeylarda, balki xonadonlarda ham ko‘zlarni quvnatib turishi kerak, deyiladi ko‘rsatuvda.
«Bu ham ma'naviyat, bu ham ma'rifat, bu ham tarix, bu ham madaniyat. Biz madaniyatni, urf-odatimizni o‘zimizdan boshlashimiz kerak-ku? Yoki noto‘g‘rimi? Mening uyimda ham yo‘q bu sopol. Hayotimizga, ro‘zg‘orimizga kirita olmadik», - dedi davlat rahbari.
Kulollarga aylanma mablag‘ va imtiyozlar berish, boshqa hududlarimizda do‘konlar ochishiga ko‘maklashish, mamlakatimizning xorijdagi elchixonalarida ko‘rgazma-savdo rastalari tashkil etish bo‘yicha ko‘rsatmalar berildi.
