Xalq ta'limi vazirligi yaxshi isitilmayotgan maktablar haqida xabar berishni so‘radi

Xalq ta'limi vazirligi O‘zbekistondagi yaxshi isimayotgan maktablar haqida xabar berishni so‘radi.

«Yurtimizda havo haroratining keskin sovishi sababli fuqarolardan maktablardagi qoniqarsiz issiqlik tizimi haqidagi ma'lumotni vazirlikning hududlardagi shtablariga mazkur havoladagi raqamlar orqali hamda @maktab_uzedubot boti orqali xabar berishlari so‘raladi.

Bundan tashqari, Xalq ta'lim vazirligi tomonidan har bir tuman (shahar)da tashkil etilgan Ekspluatatsiya xizmatlariga zudlik bilan barcha maktablarni issiqlik bilan ta'minlanganligi, isitish qozoni va qozonxonalarining sozlik holati, maktab sinfxonalari haroratini tekshirib chiqib, mavjud muammolarni joyida tezkor hal etish choralarini ko‘rish topshirildi», deyiladi vazirlik matbuot xizmati xabarida.

Ma'lumot uchun, mazkur Ekspluatatsiya xizmati tasarrufidagi umumta'lim muassasalari sonidan kelib chiqib jami 352ta «Damas» rusumli avtotransport vositalari ajratilgan va ularga GPS-treker uskunasi o‘rnatilib, ularning harakati viloyat boshqarmalari va vazirlikning Qurilish boshqarmasi tomonidan doimiy monitoring qilinadi. Xizmatlar kerakli ish qurollari, asbob-uskunalari (elektr va gaz payvandlagichlar, kesish va duradgorlik moslamalari, santexnika va elektr uskunalari) bilan ta'minlangan.