Qishloq xo‘jaligi bo‘yicha statistika ma'lumotlari bazasi kengaytiriladi

Vazirlar Mahkamasining «Qishloq xo‘jaligi sohasida statistik ma'lumotlar bazasini kengaytirish va takomillashtirish chora-tadbirlari to‘g‘risida»gi qarori qabul qilindi.

Norma’ning yozishicha, quyidagilar tasdiqlandi:

O‘zbekistonda 2024 yilda qishloq xo‘jaligi sohasida ro‘yxatdan o‘tkazish konsepsiyasi;
O‘zbekistonda 2024 yilda qishloq xo‘jaligi sohasida ro‘yxatdan o‘tkazishga doir chora-tadbirlar rejasi;
O‘zbekistonda 2024 yilda qishloq xo‘jaligi sohasida ro‘yxatdan o‘tkazishga ko‘maklashish bo‘yicha respublika komissiyasi tarkibi;
O‘zbekistonda 2024 yilda qishloq xo‘jaligi sohasida ro‘yxatdan o‘tkazishga ko‘maklashish bo‘yicha hududiy komissiyalar namunaviy tarkibi.

Konsepsiyaga muvofiq qishloq xo‘jaligi sohasida ro‘yxatdan o‘tkazish quyidagi jarayonlarni o‘z ichiga oladi:

aholini oziq-ovqat mahsulotlari bilan ta'minlash;
aholi turmush darajasi va farovonligini oshirish;
mamlakat oziq-ovqat xavfsizligi bilan bog‘liq statistik ma'lumotlar yig‘ish, umumlashtirish, baholash, tahlil qilish va e'lon qilish.

Ro‘yxatdan o‘tkazish qishloq xo‘jaligi faoliyatining quyidagi asosiy ko‘rsatkichlarini hisobga olish orqali amalga oshiriladi:

qishloq xo‘jaligi obektlarining iqtisodiy faoliyat turlari;
mehnat resurslari va ularning demografik tavsiflari;
yer resurslari va ulardan foydalanish holati;
qishloq xo‘jaligi ekinlari maydoni;
issiqxonalar maydoni va boshqalar.

Qishloq xo‘jaligi sohasida ro‘yxatdan o‘tkazishni tashkil etish va o‘tkazish 3 bosqichda amalga oshiriladi.

1-bosqichda (2022-2024 yillar) quyidagilar nazarda tutiladi:

ro‘yxatdan o‘tkazishni tashkil etish va amalga oshirish tamoyillari hamda metodik asoslari, ro‘yxatdan o‘tkazishga doir boshqa masalalarni tartibga soluvchi normativ-huquqiy hujjat ishlab chiqish;
sinov asosida qishloq xo‘jaligi sohasida ro‘yxatdan o‘tkazishga tayyorgarlik ko‘rish va uni amalga oshirish, natijalarini tahlil qilish;
ro‘yxatdan o‘tkazish yakuniy natijalarini olish va e'lon qilish uchun avtomatlashtirilgan axborot tizimi yaratish;
ro‘yxatdan o‘tkazish tadbirlarida ishtirok etuvchi xodimlarni o‘qitish.

2-bosqichda (2024 yil) bevosita qishloq xo‘jaligi sohasida ro‘yxatdan o‘tkazish tadbiri amalga oshiriladi, ya'ni qishloq xo‘jaligi faoliyati to‘g‘risidagi birlamchi ma'lumotlar yig‘iladi.

3-bosqichda (2024-2026 yillar) quyidagilar amalga oshiriladi:

ro‘yxatdan o‘tkazishga doir birlamchi ma'lumotlarni qayta ishlash uchun avtomatlashtirilgan axborot tizimida qabul qilib olish;
ma'lumotlarni avtomatlashtirilgan axborot tizimida qayta ishlashga tayyorlash va joriy etish;
ro‘yxatdan o‘tkazish bo‘yicha dastlabki natijalarni olish;
ro‘yxatdan o‘tkazish natijalarini e'lon qilish va tarqatish.