Neft-gaz sohasi uchun kadrlar tayyorlash tizimiga o‘zgarishlar kiritildi

Prezidentning 2021 yil 7 maydagi “Neft-gaz hamda elektr energetika sohalari uchun malakali kadrlar tayyorlash tizimini yanada takomillashtirish munosabati bilan O‘zbekiston prezidentining ayrim qarorlariga o‘zgartirishlar kiritish to‘g‘risida”gi qarori qabul qilindi.

U bilan prezidentning quyidagi qarorlariga o‘zgartirishlar kiritildi:

1) Prezidentning 2011 yil 6 iyuldagi qarori 6-bandi 2-xatboshisiga, u bilan belgilanishicha, I.M.Gubkin nomidagi Rossiya davlat neft va gaz universiteti Toshkent shahridagi filialiga (1-filial) kirish uchun kvotalar Rossiya davlat neft va gaz universiteti, Energetika vazirligi, Iqtisodiy taraqqiyot va kambag‘allikni qisqartirish vazirligi, Oliy va o‘rta maxsus ta'lim vazirligi, «O‘ztransgaz» AJ, «Hududgazta'minot» AJ, shuningdek boshqa tashkilotlar bilan kelishgan holda vasiylik kengashi qarori bilan tasdiqlanadi. Ilgari filialga qabul rejasi har bir o‘quv yili uchun universitet bilan kelishuvga binoan “O‘zbekneftgaz” MXK ehtiyojlarini hisobga olgan holda Vazirlar Mahkamasi qarori bilan tasdiqlangan.

2) Prezidentning 2017 yil 25 sentyabrdagi qaroriga 1-ilovada vasiylik kengashining yangilangan tarkibi tasdiqlangan.

3) Prezidentning 2019 yil 4 iyundagi qaroriga:

a) quyidagi muddatlar o‘zgartirildi:

• - 2021 yil 1 avgustga qadar Toshkent shahridagi "MEI" milliy tadqiqot universiteti" federal davlat budjeti oliy ta'lim muassasasi filialiga (2-filial) taqdim etilayotgan bino va inshootlar rekonstruksiya qilinishi;
• - 2022 yil 1 yanvarga qadar 2-filial joylashtirilishi, 2-filialga taqdim etilayotgan bino va inshootlarning zamonaviy o‘quv-laboratoriya uskunalari, kompyuter va orgtexnika, adabiyotlar va kutubxona fondi, inventar, mebel va boshqa moddiy-texnik vositalar bilan jihozlanishi;

b) "Enter Engineering Pte. Ltd. (Singapur)" - 2-filialga taqdim qilinayotgan bino va inshootlarni rekonstruksiya qilish, qurish, kapital ta'mirlash va jihozlash bilan bog‘liq ishlarning bajarilishi bo‘yicha tayyor holda topshirish" sharti asosida jalb qilinadigan bosh pudratchi tashkilot etib belgilandi. Bunda, bino va inshootlarni qurish, rekonstruksiya qilish, kapital ta'mirlash va jihozlash bilan bog‘liq ishlarning bajarilishi bo‘yicha qurilish, loyihalashtirish va moliyalashtirish ishlarini bir vaqtning o‘zida olib borishga hamda tovar (ish, xizmat)lar, qurilish materiallari, xomashyo, butlovchi qismlar va asbob-uskunalarni ishlab chiqaruvchi (xizmat ko‘rsatuvchi)lar hamda ularning rasmiy dilerlari bilan to‘g‘ridan to‘g‘ri muzokaralarni o‘tkazish va eng maqbul takliflarni tanlab olish shartlari asosida shartnomalar tuzishga istisno tariqasida ruxsat berildi.

Hujjat qonun hujjatlari ma'lumotlari milliy bazasida e'lon qilingan va 2021 yil 7 maydan kuchga kirdi.