Surxondaryoning to‘rt tumaniga alohida soliq imtiyozlari beriladi

“Bir oy ichida Surxondaryo bo‘yicha alohida qaror berasizlar. Vazirlar joylarda ishlaydi, Sherobodga, Angorga borib ishlaysizlar. 60 sektor bo‘yicha aniq reyting tizimi joriy qilasizlar. Har bir sektor bo‘yicha vazir o‘z yo‘nalishini o‘rgatib, keyin Toshkentga qaytadi.

Viloyatdagi 721 ta mahallaga alohida mutasaddilar biriktiriladi. Har bir reja puxta amalga oshirilishi kerak. Vakil o‘zing sektoriga borib yashaydi.
 
Bandixon, Qiziriq, Muzrabot va Sherobod tumanlarini kompleks rivojlantirish bo‘yicha ishlab chiqilgan 3 yillik dasturlar ijrosiga alohida e'tibor qaratiladi. Bu 4 ta tumanda yangidan tashkil etiladigan tadbirkorlik sub'yektlarini yer, mol-mulk, kichik korxona aylanmasidan olinadigan soliqlar, yakka tartibdagi tadbirkorlarning qat'iy miqdordagi daromad solig‘idan 2024 yil 1 yanvarga qadar ozod etishni taklif qilaman.

Shuningdek, viloyatdagi tog‘li va yerlari sho‘rlangan hududlarda yangidan tashkil etiladigan tadbirkorlik sub'yektlarini ham, 2024 yil 1 yanvarga qadar yuqoridagi soliqlardan ozod qilish hamda foyda solig‘i stavkasini 2 barobarga kamaytirishni maqsadga muvofiq, deb hisoblayman.

Bilaman, soliq masalasi og‘ir. Lekin men o‘sha qiyinchilikni o‘z zimmamga olaman, pensiya, nafaqalarga mayli Surxondaryodan emas, boshqa manbadan toparman. Ammo shunga yarasha natija bo‘lishi kerak", dedi davlat rahbari.