Denovdagi maktab hududi tadbirkorlarga sheriklik asosida berilgani ma'lum qilindi

Joriy yil 15 iyun kuni Kun.uz saytida «Denovda maktablar hududi talon-toroj qilinmoqda» sarlavhasi bilan tanqidiy maqola e'lon qilingan edi. Unda Denov tumanidagi 75- va 78-maktablarga tegishli hududlar tadbirkorlarga berib yuborilgani tanqid ostiga olingandi. Denov tumani hokimligi mazkur maqola yuzasidan munosabat bildirdi.

Munosabatda yozilishicha, Denov tumanidagi 75-maktab hududidagi foydalanishga yaroqsiz holga kelib qolgan eski bino hamda unga tutash 10 sotix yer tuman hokimining 2019 yil 13 iyuldagi 3941-sonli qarori bilan «ASLBEK-BUNYOD-FAYZ» MChJga «Axborot-kutubxona o‘quv markazi» binosi qurilishi uchun ajratilgan.

Denov tuman hokimining 2019 yil 5 avgustdagi 4086-sonli qarori bilan qurilish-ta'mirlash ishlari nihoyasiga yetgandan so‘ng 312 metr kvadratga ega «Axborot-kutubxona markazi» binosi 75-maktab balansiga, 688 metr kvadratga ega «O‘quv markazi» binosi «ASLBEK-BUNYOD-FAYZ» MChJ tasarrufida qoldirilishi belgilangan. Bu haqda 2020 yil 11 iyunda tuman hokimligi, tuman xalq ta'limi bo‘limi, 75-maktab ma'muriyati va «ASLBEK-BUNYOD-FAYZ» MChJ o‘rtasida kelishuv bitimi tuzilgan.

«ASLBEK-BUNYOD-FAYZ» MChJ tomonidan 75-maktab hududidan «Axborot-kutubxona o‘quv markazi» va «ID o‘quv markazi» qurish uchun viloyat Qurilish hududiy nazorat inspeksiyasining 2019 yil 2 iyuldagi 564 T/X va 2021 yil 24 fevraldagi 59/TX-sonli texnik xulosasi, viloyat Qurilish Bosh boshqarmasining 2020 yildagi 682/2020-sonli me'moriy rejalashtirish topshirig‘i olingan. Hozirgi kunda ushbu yer maydonida qurilish ishlarini davom ettirish uchun loyiha ishlari yakuniga yetkazilmagani sababli vaqtincha to‘xtatilgan.

Ta'kidlanishicha, 78-maktab bilan chegaradosh, tuman hokimligi zaxirasida bo‘lgan 120 metr kvadrat yer Denov tumani hokimining 2018 yil 7 noyabrdagi 1616-sonli qarori bilan «Yetti Xazina Mo‘jizasi» xususiy korxonasiga «Yoshlar mehnat guzari» binosi qurilishi uchun berilgan. Ushbu qaror asosida xususiy korxonaga viloyat Qurilish Bosh boshqarmasining 2018 yil 6 noyabrdagi 1430/2018-sonli me'moriy – rejalashtirish topshirig‘i, «Bino va inshootlar nazorat tahlil» MChJ, «Termiz modern proyekt» MChJ tomonidan ishlab chiqilgan loyiha-smeta hujjatlari 2020 yil 23 maydagi 110-sonli ekspertiza xulosasi olingan. Hozirgi kunda binoning 2-qavati tugallanib, 3-qavatida qurilish ishlari davom etmoqda. Denov tuman xalq ta'limi bo‘limi va Davlat soliq qo‘mitasi huzuridagi Kadastr agentligining Davlat kadastrlari palatasi tomonidan berilgan ma'lumotlarga ko‘ra, ushbu yer 78-maktab hududiga kirmaydi.