Bangladesh poytaxtidagi portlashda 7 kishi halok bo‘ldi

Bangladesh poytaxti Daqqada yuz bergan kuchli portlash oqibatida kamida 7 kishi halok bo‘ldi, 50dan ko‘proq kishi jarohatlandi. Bu haqda Daqqa politsiyasi komissari Shafiqul Islom ma'lum qildi.

Ta'kidlanishicha, portlash Mogbozor tumanidagi 3 qavatli binoning 1-qavatida yuz bergan. O‘t o‘chiruvchilar mahalliy vaqt bilan soat 19:35da portlash haqida ma'lumot olishgan. Voqea joyiga 14ta o‘t o‘chirish brigadasi yuborilgan.

Politsiya komissari portlash oqibatida yaqin atrofdagi yana 7ta binoga va 3ta avtobusga zarar yetganini ma'lum qilgan.

Binoda elektronika mahsulotlari, go‘sht sotish nuqtalari, restoran va qandolat do‘koni joylashgan bo‘lgan. Portlash oqibatida do‘konlar vayron bo‘lgan.

Politsiya komissarining ta'kidlashicha, voqeaga gaz portlashi olib kelgan bo‘lishi mumkin. U politsiyada portlash terakt yoki boshqa yovuz maqsadda amalga oshirilgan deb hisoblashga asos yo‘qligini aytgan.

Taxminlarga ko‘ra, portlash restoranda yuz bergan bo‘lishi ham mumkin. Bundan tashqari, bino oldida qurilish ishlari olib borilgan va ular davomida gaz sizib chiqqan bo‘lishi mumkin. Ushbu versiyalarning huquq-tartibot idoralari tomonidan tekshirilishi rejalashtirilmoqda.