Rossiya va O‘zbekiston harbiylari Afg‘oniston chegarasi yaqinidagi mashg‘ulotlarning faol bosqichini yakunladi

Termiz shahri yaqinida Rossiya-O‘zbekiston taktik mashg‘ulotlarining faol bosqichi yakuniga yetdi, deb xabar berdi Kommersant'  Rossiya mudofaa vazirligiga tayanib.

Xabarda aytilishicha, mashg‘ulotlarga ikki mamlakatning 1,5 mingga yaqin harbiy xizmatchisi, 200 birlikka yaqin qurol, harbiy va maxsus texnika, Rossiya harbiy kosmik kuchlarining 4ta Tu-22M3 samolyoti jalb etildi. 

«Rossiya-o‘zbek harbiy guruhi havodan turib qurollangan guruhlarni aniqladi, so‘ngra ularning mamlakat hududiga kirishining oldini olib, aholi punktida yashirinib olgan «jangarilar»ni yo‘q qildi», — deyiladi xabarda.

Mashg‘ulotlarning yakuniy bosqichini Rossiya qurolli kuchlari bosh shtabi boshlig‘i, armiya generali Valeriy Gerasimov va uning o‘zbekistonlik hamkasbi general-mayor Shuhrat Xolmuhamedovlar kuzatdi.

Avvalroq Tojikistondagi Harbmaydon poligonida Rossiya, Tojikiston va O‘zbekiston harbiylari ishtirokida 10 avgustgacha o‘quv mashg‘ulotlari bo‘lib o‘tishi ma'lum qilingandi.