Shomurodov va Masharipovsiz. «Oq bo‘rilar» Shvetsiyadagi o‘yinga tayyorlanmoqda

O‘zbekiston milliy jamoasi Toshkentda Srechko Katanets murabbiyligidagi ilk yig‘inini o‘tkazmoqda. Sloveniyalik murabbiy hozircha mahalliy maslahatchilar yordamida chaqirilgan futbolchilarni sinovdan o‘tkazmoqda. Shu sabab hozircha murabbiy ham, futbolchilar ham bir-biri haqida to‘liq tasavvurga ega emas.

Ketma-ket ikkinchi kun mashg‘ulotlarda milliy jamoa yetakchisi Jaloliddin Masharipov qatnashmadi. Ma'lum bo‘lishicha, futbolchi Shvetsiyaga ketish uchun kerak bo‘ladigan viza masalasini hal qilish uchun mashg‘ulotlarda qatnashmaslikka majbur bo‘lgan.

Shuningdek, milliy jamoaning asosiy yulduzi Eldor Shomurodov ham yig‘inda qatnashmayapti. Katta ehtimol bilan «Roma» hujumchisiga to‘g‘ri Shvetsiya poytaxtida o‘tadigan o‘yinga borishga imkoniyat yaratib berilgan. Qolgan futbolchilar to‘liq tarkibda mashg‘ulotlarda ishtirok etyapti.

Hozircha Shvetsiya bilan o‘yinda kim jamoa sardori bo‘lishi aniq emas. Murabbiy va futbolchilar o‘zaro kelishib Otabek Shukurov yoki Jaloliddin Masharipovdan birini sardor etib tanlashi kutilyapti. Shuningdek, Eldor Shomurodov ham sardor bo‘lishi mumkin.

Tribuna.uz muxbirlari bosh jamoa mashg‘ulotining OAV uchun ochiq qismini suratga tushirishdi. Milliy jamoadagi muhit va futbolchilarning kayfiyati haqida ushbu foto va videolavhalarda bilib olishingiz mumkin.