Kobul aeroporti xalqaro tijorat reyslarini qabul qila boshladi

Kobul aeroportiga Afg‘onistondan AQSh qo‘shinlari olib chiqilib, hokimiyat tepasiga “Tolibon” kelgandan keyin xalqaro tijorat reysini bajargan birinchi samolyot qo‘ndi. Bu haqda 13 sentyabrda AFP axborot agentligi xabar berdi.

Agentlikning ma'lum qilishicha, Pokiston poytaxti Islomoboddan reysni Pakistan International Airlines aviakompaniyasiga tegishli samolyot bajargan. Ta'kidlanishicha, uning bortida bor-yo‘g‘i 10 kishi bo‘lgan.

Kobulda Islomobodga qaytish reysini 100ga yaqin kishi, asosan Jahon banki kabi xalqaro tashkilotlar xodimlarining yaqinlari kutgan.

“Tijorat reyslarining tiklanishi tegishli hujjatlarga ega afg‘onlarga mamlakatni erkin tark etishga ruxsat berishga va'da bergan toliblar uchun muhim sinov bo‘ladi”, deb yozgan agentlik.

O‘tgan hafta Qatar Airways aviakompaniyasi Kobuldan bir nechta charter reysni amalga oshirgandi. Ular bortida asosan xorijliklar va mamlakatdan evakuatsiya qilinmay qolgan afg‘onlar bo‘lgan.

Avvalroq bir nechta aviakompaniya maqbul sharoitlar yaratilsa, Kobul aeroportiga parvozlarni amalga oshirish istagini bildirgandi.