Shavkat Mirziyoyev: Namanganda kelgusi besh yilda 7ta oliygoh tashkil etiladi

Namangan viloyatida oliy ta'lim bilan qamrab olish darajasi 50 foizga yetkaziladi. Bu haqda Shavkat Mirziyoyev saylovchilar bilan uchrashuvda ma'lum qildi.

“Farzandlarimizning ta'lim-tarbiyasini zamon talablari asosida tashkil etish, ularni talab yuqori va raqobatbardosh bo‘lgan mutaxassislik va kasb-hunarlarga o‘qitish, bo‘sh vaqtlarini mazmunli o‘tkazishlari uchun zarur sharoitlar yaratiladi.

Viloyatda kelgusi besh yilda 52 ta davlat va 1 ming 300 ta oilaviy bog‘cha tashkil etiladi. Ayniqsa, maktabgacha ta'lim tashkilotlari mavjud bo‘lmagan 58 ta mahallada 116 ta oilaviy bog‘cha tashkil etiladi. Buning hisobiga, maktabgacha ta'lim bilan qamrab olish darajasi 68 foizdan 82 foizga yetkaziladi.

Viloyatda 37 ta yangi maktab quriladi, 473 ta maktab rekonstruksiya qilinadi va kapital ta'mirlanadi. Natijada, 101 mingdan ziyod qo‘shimcha o‘quvchi o‘rinlari yaratilib, 512 mingtaga yetkaziladi. 132 ta maktabda zamonaviy sport zallari quriladi.

Oliy ta'lim bilan qamrab olish darajasi 50 foizga yetkaziladi. Buning uchun Namanganda kelgusi besh yilda 7 ta oliygoh tashkil etilib, jami oliy o‘quv yurtlari soni 10 taga yetkaziladi. Ibrat ijod maktabi negizida Chet tillar oliygohi tashkil etiladi.

Talabalarni turar joy bilan ta'minlash maqsadida qo‘shimcha 3 ming 600 o‘rinli 9 ta yangi yotoqxona qurib bitkaziladi. Natijada, talabalar turar joyiga ehtiyoj hozirgi 15 foizdan 54 foizga ta'minlanadi”, dedi Shavkat Mirziyoyev.