Biz o‘tgan 5 yilda qo‘rquvdan qutuldik – Shavkat Mirziyoyev

Bugun, 28 sentabr kuni prezidentlikka nomzod Shavkat Mirziyoyev Farg‘ona viloyatida O‘zLiDeP tomonidan tashkillashtirilgan saylovchilar bilan uchrashuvda ishtirok etmoqda.

Kun.uz muxbirining xabar berishicha, Farg‘onadagi uchrashuvda nomzodga so‘z berilganida, Shavkat Mirziyoyev saylov jarayoni haqida o‘z fikrini bildirdi.

“O‘tgan 5 yil davomida biz nimadan qutuldik, desangiz men aytaman – qo‘rquvdan qutuldik. Mana, kecha Namangandagi uchrashuvda bir tadbirkor menga aytyapti – hozir 80 mln dollarlik aylanma mablag‘im bor, deyapti. Oldingi davr bo‘lsa 80 mln emas, 8 ming dollari bo‘lsa darhol nazoratga olinardi. Kim halol ishlayotgan bo‘lsa xotirjam yuraversin, boy bo‘lsin, xalqiga foydasi tegsin.

Saylovda hamma o‘z yuragiga qarab tanlov qilsin. Kimni istasangiz shuni saylang. Faqat oldingidek bir kishi butun oilaning pasportini olib borib saylab kelmasin. Ongli ravishda bo‘lsin. Demokratik yo‘ldan ketishimizni butun dunyo hamjamiyatiga namoyish etamiz, deb ishonaman”, – deya nomzodning so‘zlarini keltirmoqda Kun.uz muxbiri.

Tayyorlagan: Аброр Зоҳидов

#Farg‘ona #Shavkat Mirziyoyev

Saylov qonunchiligiga kiritilgan o‘zgartishlarga ko‘ra saylovlar oktyabr oyi uchinchi o‘n kunligining birinchi yakshanbasida o‘tkazilishi belgilandi. 2021 yilgi prezidentlik saylovi 24 oktyabrga to‘g‘ri kelmoqda.