Surxondaryo birlamchi tibbiy xizmatiga budjetdan ajratiladigan mablag‘ ikki barobar oshiriladi

“Buning evaziga oilaviy poliklinikalar va shifokorlik punktlarida qon bosimi va qandli diabet davolash uchun dori vositalari bepul beriladi, 765 ming nafar bolalar va 62 ming homilador ayollar 7 turdagi vitaminlar bilan bepul ta'minlanadi, zarur uskunalar bilan jihozlanib, kasalliklarni barvaqt aniqlash yo‘lga qo‘yiladi, har bir fuqaroning elektron tibbiy kartasi yuritilib, ular bilan manzilli ishlash tashkil etiladi.

Shuningdek, 24 ta oilaviy shifokorlik punktlari va 4 ta oilaviy poliklinika yangi ochiladi, 89 ta tibbiyot muassasalari to‘liq qayta ta'mirlanadi.

Shifoxonalarda amalga oshiriladigan davolash turlari soni 130 tadan 168 tagacha oshiriladi. Jumladan, har bir tuman va shahar kasalxonalari zamonaviy uskunalar bilan jihozlanib, 20 turdagi eng ko‘p uchraydigan operatsiyalarni kam-invaziv usulida amalga oshirish yo‘lga qo‘yiladi.

Shuningdek, Sariosiyo, Sherobod va Denovda jarohatlar va o‘tkir qon-tomir kasalliklari markazlari ishga tushiriladi. Uzun, Oltinsoy, Sho‘rchi, Denov va Sariosiyo tumanlariga tibbiy xizmat ko‘rsatadigan 150 o‘rinli mintaqaviy bolalar shifoxonasi barpo etiladi. Denov, Boysun, Sherobod va Qumqo‘rg‘onda perinatal markazlar tashkil qilinadi.

Tug‘ma va orttirilgan yurak nuqsoni bilan 5 ming nafar, infarkt bilan 11 ming nafar, jarrohlikka muhtoj bemorlarni davolash uchun kardioxirurgiya amaliyoti yo‘lga qo‘yiladi. Buning uchun viloyat ko‘ptarmoqli tibbiyot markazini jihozlashga 2 million dollar ajratiladi.

Kadrlar muammosi hal qilish maqsadida olis qishloqlarga boradigan shifokorlarni qo‘llab-quvvatlash dasturi davom ettiriladi va bunga qo‘shimcha 20 milliard so‘m ajratiladi. Viloyat kardiologiya markazida barcha zamonaviy operatsiyalarni amalga oshirishga imkon beradigan yangi korpus barpo etiladi va bu yerda barcha og‘ir jarrohlik amaliyotlari bajariladi.  

Xabaringiz bor, qator yillar davomida paydo bo‘lgan muammoni hal qilish maqsadida 2018 yilda Toshkent tibbiyot akademiyasining Termiz filiali tashkil qilingan edi. Tibbiyot sohasida kadrlar ta'minotini yaxshilash maqsadida, xorijiy hamkor oliygohni jalb etib, ushbu filialning alohida mustaqil institut sifatida faoliyati yo‘lga qo‘yiladi. Unga bir ming o‘rinli o‘quv binosi va ko‘p tarmoqli klinika barpo etiladi hamda zamonaviy uskunalar bilan ta'minlanadi”, dedi amaldagi prezident.