Aftidan, Ole Gunnar Sulsher uchun murabbiylik faoliyatidagi eng og‘ir damlar keldi: «Manchester Yunayted» «Liverpul» bilan o‘yingacha 8 o‘yinning 4tasida mag‘lub bo‘ldi, oldinda — «Tottenhem», «Atalanta» va «Manchester Siti», endi esa «Liverpul» «Old Trafford»da qatl marosimi o‘tkazdi, mankunianliklar ushbu jamoa bilan qarama-qarshiliklar tarixidagi eng yirik mag‘lubiyatini qabul qilib oldi.
Klopp jamoasi mezbonlarni o‘yin boshidayoq nokdaunga uchratdi: 13-daqiqaga kelib ikki to‘p farqi yuzaga keldi. O‘tgan mavsumda asosiy tarkibdan muqim o‘rin egallay olmagan va qatorasiga ikki o‘yinda qatnashishi noyob holat bo‘lgan Nabi Keyta bu mavsumda qatorasiga ikkinchi o‘yinda gol urdi. Muhammad Saloh mavsumdagi golli uzatmalari sonini beshtaga yetkazdi. Ikkinchi gol esa Trent va Diogu Jota tomonidan uyushtirildi: birinchisi to‘pni qanotdan uzatib berdi, ikkinchisi unga bir teginish bilan darvozani ishg‘ol qildi.
«Manchester Yunayted» «Atalanta» bilan o‘yinda ham (3:2) birinchi bo‘lim davomida 0:2 hisobida ortda borgan, ammo o‘sha o‘yinda «qizil iblislar»ning hujum chizig‘i ancha qiziqarli ko‘ringandi. «Liverpul» bilan o‘yinda ham «MYu» vaqti-vaqti bilan hujumga o‘tib turdi, ammo amalda jiddiy tahdid kuzatilmadi.
Lekin mehmonlar to‘xtashni xayollariga ham keltirishmadi. Yakkama-yakka vaziyatni yo‘qqa chiqargan Saloh o‘yindan uzilib qolmadi va bir necha daqiqa o‘tib baribir niyatiga erishdi. Nabi Keyta qarzini qaytarib, to‘pni darvoza qarshisidagi sherigiga yetkazib berdi, misrlik hujumchi qatorasiga o‘ninchi o‘yinda gol urdi.
Mavzuga oid
Birinchi bo‘lim yakunlanishi arafasida Alisson darvozasi oldida keskinlik yuzaga keldi, ammo bu epizod «Liverpul» darvozabonining seyvi bilan emas, Krishtianuning asablari dosh bermagani bilan yodda qoldi: Jons to‘p uchun kurashda Ronaldudan ustun keldi, portugaliyalik futbolchi esa gazonda yotgan Jonsdan to‘pni olib qo‘yish uchun uni tepa boshladi. Arbitr Teylor sariq kartochka bilan kifoyalandi, «Liverpul» yana bir gol bilan javob qaytardi. Saloh bo‘limga qo‘shib berilgan beshinchi daqiqada dublni rasmiylashtirdi.
Foto: MARTIN RICKETT/GETTY IMAGES
Birinchi goli 29 yoshli forvardga Premer-liga tarixidagi eng yaxshi afrikalik to‘purar bo‘lib olish imkonini berdi. Tanaffusga qadar u APLdagi gollari sonini 106taga yetkazdi — 104 gol bilan birinchi bo‘lib turgan Dide Drogba ortda qoldirildi (lekin u ligada Salohdan 87ta kamroq o‘yin o‘tkazgan).
Tanaffusda Sulsher APLning eng yaxshi assistenti bo‘lib turgan Pol Pogbani maydonga tashladi. Ammo bu ham yordam bermadi. «Yunayted» futbolchilari follar va kartochkalarni kolleksiya qila boshlashganida (41-daqiqadan 46-daqiqagacha Teylor to‘rtta sariq kartochka ko‘rsatdi), «Liverpul» tanaffusga chiqmagandek o‘yin ko‘rsatdi. Henderson bitta pas bilan «Manchester Yunayted» himoyasini dog‘da qoldirdi va Salohni Xea bilan yakkama-yakka vaziyatga chiqardi, misrlik futbolchi esa het-trikni rasmiylashtirdi va APLdagi gollari sonini 107-taga yetkazdi. «Old Trafford» tribunalari hakam hushtagi chalinishidan ancha oldinroq bo‘shay boshladi.
De Xea esa qiyin daqiqalarni o‘tkazdi — o‘yin so‘nggiga qadar u yana bir qancha seyvlar amalga oshirib, jamoasini muqarrar gollardan qutqardi. U «Manchester Yunayted» fanatlari bu o‘yinda e'tiroz bildirmasligi kerak bo‘lgan yagona o‘yinchi edi.
5:0 — Yurgen Kloppning «Liverpul» boshqaruvidagi 200-g‘alabasiga aylandi. Qizillar «Chelsi» ortidan ikkinchi o‘rinda bormoqda, «Manchester Yunayted» turnir jadvalining 7-o‘rnida qoldi.
Angliya: Tuxel va Gvardiola yirik hisoblarda g‘alaba qildi
Chempionlar ligasida kamtargina «Malmyo» ustidan qozonilgan g‘alaba londonliklarga qimmatga tushgandi - Lukaku va Verner jarohat olib safdan chiqdi. Ammo Tomas Tuxelga muvaffaqiyat uchun hujumchi shart bo‘lmadi. Ayniqsa hozirdanoq chempionship yo‘llanmasi uchun asosiy da'vogarga aylangan «Norvich»ga qarshi o‘yinda. «Kanareykalar» to‘qqiz turda atigi ikki ochko jamg‘arishdi va jamoadagi holat umidsiz ko‘rinmoqda.
«Stemford Brij»dagi o‘yin APL yetakchisi va turnir autsayderi o‘rtasidagi farq qanchalar chuqur ekanini ko‘rsatdi. Maunt va Hadsona-Odoining tezkor gollari «Chelsi» safida istalgan futbolchi gol ura olishi haqidagi aksiomani yana bir bor tasdiqladi. Bu ikkisi bilan birga londonliklar safida mavsum boshidan buyon Angliya chempionati o‘yinlarida kamida bitta gol urgan futbolchilar soni 15 kishiga yetdi. Agar barcha turnirlar hisobga olinsa, bombardirlar soni, avtogollar hisobga olinmagan taqdirda, 17 nafarni tashkil etadi.
Shusiz ham qiyin ahvolda bo‘lgan «Norvich»da 65-daqiqada himoyachi Gibson ikkinchi sariq kartochkani oldi va o‘yin mehmonlarning yerga urilishi bilan yakunlandi. Tuxel kelganidan keyingi davrda jamoaning asosiy to‘purari bo‘lib turgan Maunt (9) het-trik rasmiylashtirdi.
«Chaykalar»ning bu mavsumda kuchli to‘rtlikka kirib olishiga ko‘pchilik ko‘nikkandi, ammo turnir jadvalida «Brayton» bilan yonma-yon turgan amaldagi chempion oradagi asl farqni ko‘rsatib qo‘ydi. O‘tgan mavsum so‘nggida Grem Potter jamoasi ikki to‘p farqini yo‘qqa chiqarib, «Siti» ustidan g‘alabaga erishgandi (3:2), ammo bu safar raqibga jiddiy qarshilik ko‘rsatilmadi.
Maydon egalari o‘yinda hisob ochilgan vaziyatda hakamlikdan norozi bo‘lishdi, Gundo‘g‘anning goli oldidan qoida buzilganini iddao qilishdi. Ammo VAR darvozabon xato qilgani va gol to‘g‘ri inobatga olinganini tasdiqladi. Shunday ekan, «shaharliklar» yarimhimoyachisi APLda 30ta gollik dovondan o‘tgan germaniyalik futbolchilar ro‘yxatida faqat Ozildan ortda qolib, ikkinchi o‘ringa chiqdi, Fodenning dublidan keyin o‘yinda intriga qolmadi.
Xosep Gvardiola jamoasi o‘yinning ikkinchi qismini haddan tashqari pragmatik o‘tkazdi, bo‘lim oxirlarida «Brayton» penalti orqali hisobni qisqartirishga erishdi. Lekin bu gol chempionlarni uyg‘otishga xizmat qildi va jamoa yana butun kuch bilan oldinga tshlanib, o‘yin oxirigacha hisobni yana yirik ko‘rinishga keltirishdi.
Kadrlar barchasini hal qiladi, bu haqiqatni «Lester» yana bir bor tasdiqladi. «Tulkilar» avvaliga cho‘loqlanayotgandi, ammo Brendan Rodjyers shogirdlari o‘ziga kelib oldi va so‘nggi turlarni yuqori sur'atlarda o‘tkazmoqda. «MYu» ustidan qozonilgan g‘alaba ortidan Yevropa Ligasida safarda «Spartak» darvozasiga to‘rt gol urildi, endi APLning kurashdan tolmas yangi a'zosiga qarshi oddiy bo‘lmagan o‘yinda natijaga erishildi. «Lester» hamon turnir jadvali o‘rtalarida qolmoqda, ammo beshinchi o‘rindagi «Brayton» bilan oradagi farq atigi bir ochko.
«Vest Hem» — «Tottenhem» — 1:0 (Antonio, 72)
Bu turdagi London derbisida g‘alaba qozongan «bolg‘achilar» Chempionlar ligasi kvartetida mustahkamlanib olishdi. Devid Moyyes shogirdlari o‘zaro bahsda mag‘lub etilgan «Tottenhem» hamda bu turda yirik hisobda yutqazgan «MYu» bilan oradagi farqni oshirdi. Uchrashuv avvalida ko‘pchilik Keyndan yorqin o‘yin o‘tkazishini kutishgandi, u bu o‘yinda jamoasini APLda 250-o‘yinida maydonga boshlab chiqqandi, ammo yakshanba kun qahramoni boshqa futbolchi bo‘ldi. Antonioni oqshomning kutilmagan triumfatori deyish qiyin, chunki «shporlar» uning uchun sevimli raqibga aylangan. Hujumchi bu raqib darvozasiga oltinchi marta gol urdi, u so‘nggi uch uchrashuvda barqaror ravishda «Tottenhem» darvozasini ishg‘ol etmoqda. «Vest Hem»ning g‘alabasi o‘yinga mos bo‘ldi, ikkinchi bo‘limda maydon egalari darvozasiga birorta zarba berilmadi.
Mo‘jiza ro‘y bermadi — klasiko Madrid foydasiga hal bo‘ldi.
Bir necha yil muqaddam futbol olami Krishtianu Ronaldusiz klasikoga ko‘nikkandi. Endi Messi va Serxio Ramossiz (bu futbolchilar ispan futbolidagi asosiy o‘yinning 45tasida qatnashgan holda rekord qo‘yishgan) hayot boshlandi. Yakshanba kungi «Kamp Nou»dagi o‘yin arafasida endi kimlar yangi qahramonlar bo‘lishini kutishardi.
Kataloniyada avlodlar almashinuvi davom etmoqda. Bu safargi o‘yinda klasikodagi debyutini amalga oshirgan 17 yoshli Gavi so‘nggi 80 yillikda klasikoda maydonga tushgan eng yosh futbolchiga aylandi. Madridliklar safida esa yarimhimoyada hamon o‘sha-o‘sha uchlik harakatlanmoqda - Modrich, Kazemiro va Kroos. O‘yindan oldin Ronald Kuman o‘z jamoasida ham yoshlarga yordam berib, ular ilk daqiqalardanoq qo‘rqmay o‘ynashini ta'minlay oluvchi qator tajribali futbolchilar borligini aytib o‘tdi.
Dastlabki o‘n daqiqalikda «Barsa» nafaqat dadillik bilan, balki aqlli ham o‘ynadi. To‘p ularning nazoratida bo‘ldi, bu vaqtda «Real» maydonning raqib qismiga o‘ta olmay ham qoldi. Keyin o‘yin o‘zgara boshladi, lekin bu prinsipial o‘zgarish emasdi, tartiblilik va tashkiliylik birinchi o‘ringa chiqdi. Vinisius — akademik uslubdan brazilcha o‘yinga qaytishda birinchilardan. Uning qanotdagi fintlariga Minges tayyor emasligi yana bir bor ko‘rinib qoldi, himoyachi forvardni jarima maydoni ichida quvib yetganida u birinchi kontaktdan keyinoq yiqilib berdi. Ammo «Real»ga penalti berilmadi.
Keyin Destning uzoq vaqtgacha yodda qoluvchi noaniq zarbasi ro‘y berdi. Terma jamoa safida shedevr gollar urib yuruvchi amerikalik futbolchi jarima maydoni markazida, darvozadan to‘qqiz metr masofada turib to‘pni tribunaga qarata tepdi. Keyin esa madridliklar tajribadagi farqni namoyish etishdi, o‘z jamoasi jarima maydoni yaqinida to‘pni egallagan Alaba hujumni boshlab berdi va uni o‘zi uzoq burchani aniq nishonga olgan holda yakunladi — ter Shtegen ilojsiz holatda edi. O‘yindagi birinchi zarba — birinchi gol.
Statistika nuqtayi nazaridan «Barsa»ning g‘alaba uchun imkoniyatlari daqiqa sayin yo‘qolib bordi, jamoa oxirgi marta 1989 yilda uy klasikosida birinchi bo‘lib gol o‘tkazgan holda g‘alaba qozongan. Bu qanchalar olisda ro‘y berganini tushunish uchun o‘shanda kataloniyaliklarning ikkita javob golini aynan Kuman urganini keltirish mumkin. Endi niderlandiyalik mutaxassis murabbiy sifatida buni uddalashga harakat qilishi kerak edi. Tanaffusda o‘yin qaytadan qurildi: tezkor Dest Vinisiusga qarshilik ko‘rsatishi uchun ortga surildi, hujumni kuchaytirish uchun Mingesa o‘rniga tajribali Filippe Koutino tushirildi.
Bundan maqsad tushunarli edi, ammo realizatsiyaga kelganda hech narsa o‘zgarmadi. Azart va qaysarlik bilan madridliklar himoyasini hayratlantirib bo‘lmasdi. Benzema bir necha metr masofadan zarba yo‘llagan (noaniq) kabi holatlar «Barsa»da yuzaga kelmadi. Taktik shaxmatda Anchelotti ustunlik qildi. Italiyalik mutaxassisda o‘ng qanotni kuchga to‘lgan Valverde bilan yopish imkoniyati bo‘lgani holda, Kuman endigina safga qaytgan Agueroning gol sezish qobiliyatiga va ikkinchi qavatda to‘p uchun kurashda ustunlik qilishi mumkin bo‘lgan Lyuk de Yongning omadi kelishiga umid qilishi mumkin edi.
Joan Laporta tomonidan yana bir bor ishonch bildirilgan murabbiy «Barsa»dan hozircha mo‘jiza kutish kerak emasligini aytgandi. U bu gapini Chempionlar ligasi haqida aytgan bo‘lsa-da, klasiko — ham daraja borasida bu turnirdan qolishmaydi. U bir yil ichida jamoani ikkinchi marta qaytadan qurishiga to‘g‘ri kelmoqda — bu ish moliyaviy inqiroz sharoitida olib borilayotgani esa alohida masala. O‘tgan mavsumda uning ixtiyorida Messi va Grizmann bor edi.
Hozir — kuchdan qolgan faxriylar va hali yetilmagan yoshlar davri. Shuning uchun, kataloniyalik muxlislar reallikni qabul qilib, sabrli bo‘lishi talab etiladi, ular uchun ijobiy holat va kelajakka umid berishi mumkin bo‘lgan jihat, bu safar jamoa «Bavariya» va «Atletiko»ga qarshi o‘yinlarda bo‘lgani kabi ilojsiz ko‘rinmadi.
Tan olish kerak, 1965 yildan buyon qatorasiga to‘rtinchi klasikoda g‘olib bo‘lgan «Real» hozir shunchaki boshqa darajada. Qo‘shimcha daqiqalarda «Madrid» buni namoyish etdi, mezbonlarning xavfli hujumiga Lukas Vaskesning goli bilan javob qaytarildi. So‘nggi daqiqada Agueroning ko‘k-anorranglilar safidagi debyut goli esa umid uchquni bo‘lib qoldi.
«Kamp Nou»dagi klasiko boshqa o‘yinlarni soyasida qoldirishi oldindan ma'lum edi, ammo tur arafasida beshinchi o‘rinda turgan va hozirda turnir jadvalida kutilmaganda peshqadamga aylangan jamoa o‘rtasidagi to‘qnashuvni e'tibordan chetda qoldirib bo‘lmasdi. Tan olish kerakki, dramatizm va go‘zallik borasida bu uchrashuv «Barsa» va «Real»ni soyada qoldirdi.
O‘yinning birinchi qismini basklar o‘z foydasiga hal qilishdi, birinchi gol urilishiga olib kelgan kombinatsiya vaqtida to‘p maydon markazida raqibdan olib qo‘yildi, bir necha aniq uzatmalar amalga oshirildi va yakunda Serlot Isakning pasini yo‘qqa chiqarmadi. Shved forvardi o‘zi ham gol urganida esa «Real Sosedad»ning g‘alabasi muqarrardek ko‘rinardi.
Ammo hech kim «Atletiko»dan irodani tortib ololmaydi, qolaversa, «matraschilar» safida Suares kabi saviyali hujumchi bor. Urugvaylikning dubli uni la liga tarixidagi eng yaxshi to‘purarlar ro‘yxatida 15-o‘ringa yaqinlashdi. Gollari sonini 171taga yetkazgan forvard tarixiy natijaga erishishi uchun yana 9 gol qoldi. Lekin madridliklar jamoasi «Real» va «Sevilya» bilan tenglasha olmadi. Birinchi o‘rinda esa hamon San-Sebastyandan bo‘lgan jamoa joylashgan, ammo favoritlar Janubiy Amerikadagi saralash o‘yinlari oqibatlaridan butunlay xalos bo‘lgach, barchasi yana o‘z joyiga qaytishiga shubha qilmasa ham bo‘ladi.
Klasiko arafasida «Sevilya» la liga yetakchisiga aylanib oldi, «Levante»ga qarshi o‘yinda aql bovar qilmas gollar shousi kuzatildi. Barchasi Torresning ajoyib goli bilan boshlandi, burchak zarbasi ijro etilganida u to‘pni to‘xtatmasdan darvoza ustuni ostiga yo‘lladi. Xulen Lopetegi jamoasi so‘nggi besh turda to‘rt g‘alabaga erishgan holda kuchli to‘rtlikda bormoqda.
«Ko‘rshapalaklar» g‘alabasiz seriyasini davom ettirdi (3 durang va 3 mag‘lubiyat). Shanba kuni mehmnlar olti daqiqa ichida ikki gol urishdi, 55-daqiqada mezbonlar safida Li Kang In maydondan chetlatilgach, o‘yin taqdiri hal bo‘lgandek edi.
Ammo yakunda birinchi bo‘lib tribunalarni yuz foizga to‘ldirish huquqiga ega bo‘lgan «Mestalya» arbitr tomonidan qo‘shib berilgan daqiqalarda aql bovar qilmas hodisalarga guvoh bo‘ldi. «Valensiya»ni o‘yinga Gonsalu Gedeshning o‘ta nozik zarba bilan «to‘qqizlik»ni nishonga olishi qaytardi. Qo‘shib berilgan sakkizinchi daqiqada — «Malorka» safida Fera Nino qulay vaziyatni qo‘ldan chiqarganidan keyin Gayya Markos Andrening uzatmasini yiqila turib golga aylantirdi. Mezbonlar sardori bu mavsumda kutilmaganda to‘purarlik qobiliyatini namoyish etmoqda. Qatorasiga ikki o‘yinda o‘z nomini tabloga yozdirib qo‘ygan Gayya bungacha La Liganing 207 o‘yinida bittagina gol urgandi.
