Shavkat Mirziyoyev Ilhom Aliyevni 60 yoshlik yubileyi bilan tabrikladi

O‘zbekiston prezidenti Shavkat Mirziyoyev 24 dekabr kuni Ozarboyjon prezidenti Ilhom Aliyev bilan telefon orqali muloqot qildi. Bu haqda prezident matbuot xizmati xabar bermoqda.

Davlat rahbari Ilhom Aliyevni 60 yoshlik yubileyi bilan samimiy tabriklab, unga mustahkam sog‘lik, farovonlik va katta muvaffaqiyatlar, birodar Ozarboyjon xalqiga tinchlik-osoyishtalik va ravnaq tiladi.

Yetakchilar O‘zbekiston-Ozarboyjon strategik sheriklik va ko‘p qirrali hamkorlik munosabatlari kun tartibidagi dolzarb masalalarni ko‘rib chiqdi.

Savdo-iqtisodiy aloqalar ijobiy sur’at bilan rivojlanib borayotgani qayd etildi. Shu oyda Boku shahrida sanoat ko‘rgazmasi va ishbilarmonlar kengashining navbatdagi yig‘ilishi o‘tkazildi. Ikki tomonlama madaniy-gumanitar dastur doirasida faol almashinuvlar davom etmoqda.

Davlat rahbarlari ustuvor tarmoq va yo‘nalishlarda, shu jumladan mashinasozlik, energetika, qishloq xo‘jaligi, transport va logistika sohalarida amaliy hamkorlik bo‘yicha loyihalarni jadal ilgari surish muhim ekanini qayd etdi.

Mintaqaviy siyosat hamda xalqaro tashkilotlar doirasidagi hamkorlik masalalari yuzasidan ham fikr almashildi. Bo‘lajak tadbirlar rejasi ko‘rib chiqildi, deyiladi xabarda.